२६ नोव्हेंबरला आळंदी येथे १८ वे वारकरी अधिवेशन !

पुणे – ‘हरिद्वार’ आणि ‘ऋषिकेश’ या तीर्थक्षेत्रांच्या धर्तीवर श्रीक्षेत्र पंढरपूर, देहू, आळंदी, पैठण आदी तीर्थक्षेत्रे यांसह राज्यातील सर्व मंदिरे, तीर्थक्षेत्रे यांचा परिसर १०० टक्के ‘मद्य-मांस मुक्त’ करण्यात यावा, पंढरपूर येथील चंद्रभागा अन् आळंदी येथील इंद्रायणी नदीत सांडपाणी सोडण्यास बंदी घालावी यांसह विविध मागण्यांसाठी २६ नोव्हेंबर या दिवशी आळंदी येथे १८ व्या वारकरी अधिवेशनाचे आयोजन करण्यात आले आहे. राष्ट्रीय वारकरी परिषद आणि हिंदु जनजागृती समिती यांच्या वतीने होणारे हे अधिवेशन दुपारी २ ते सायंकाळी ५ या वेळेत श्री देविदास धर्मशाळा तथा वै. मामासाहेब दांडेकर स्मृती मंदिर, गोपाळपुरा, आळंदी येथे घेण्यात येणार आहे, अशी माहिती राष्ट्रीय वारकरी परिषदेचे प्रवक्ते ह.भ.प. निवृत्ती महाराज हल्लाळीकर यांनी प्रसिद्धीपत्रकाद्वारे दिली आहे.

ह.भ.प. रामचंद्र महाराज पेनोरे म्हणाले, ‘‘गेली १७ वर्षे अधिवेशन घेतले जात असून येथे वारकर्‍यांचे प्रश्न सोडवण्यासाठी पाठपुरावा घेतला जातो. यंदाही त्यांच्या प्रश्नांवर चर्चा होईल.’’

ह.भ.प. तुणतुणे महाराज म्हणाले, ‘‘हे अधिवेशन पू. अमृताश्रम स्वामी महाराज (दंडी स्वामी) यांच्या प्रमुख उपस्थितीत होत असून परिषदेसाठी देवगड संस्थानचे मठाधिपती आणि विश्व हिंदु परिषदचे केंद्रीय मार्गदर्शक श्रीमहंत भास्करगिरी महाराज, प्रज्ञापुरी ज्ञानपीठ अक्कलकोटचे पीठासन धर्माधिकारी श्री. प्रसाद पंडित, वारकरी शिक्षण संस्थेचे अध्यक्ष ह.भ.प. भागवताचार्य केशव महाराज उखळीकर, पंढरपूर येथील विठ्ठल-रुक्मिणी संस्थानचे विश्वस्त ह.भ.प. प्रकाश महाराज जवंजाळ, पालघर हिंदू शक्तीपीठाचे हिंदूभूषण श्री. भारतानंद सरस्वती महाराज, श्री संत ज्ञानेश्वर महाराज संस्थान समिती आळंदीचे विश्वस्त ह.भ.प. निरंजननाथजी महाराज, ह.भ.प. भगवान महाराज कोकरे, हिंदु जनजागृती समितीचे प्रवक्ते डॉ. उदय धुरी यांसह अन्य मान्यवर वक्ते मार्गदर्शन करणार आहेत. तरी भाविक, सांप्रदायिक साधक यांनी मोठ्या संख्येने त्यासाठी उपस्थित रहावे, तसेच अधिक माहितीसाठी ह.भ.प. बापू महाराज रावकर यांना ९९७५५७२६८४ या क्रमांकावर संपर्क साधावा.’’