‘साधकांनी आध्यात्मिक प्रगती करण्यासाठी नेहमी सत्याचा बोध घ्यावा !’ – योगतज्ञ प.पू. दादाजी वैशंपायन

‘एकदा योगतज्ञ प.पू. दादाजी वैशंपायन यांनी त्यांच्या खोलीच्या दाराला आतून कडी लावली होती. त्या वेळी एका साधकाला योगतज्ञ दादाजींना तातडीने काहीतरी विचारायचे होते. त्या साधकाने एका कागदावर ‘प.पू. दादाजी केवळ २ मिनिटे काम आहे’, असा निरोप लिहून तो कागद त्यांच्या खोलीचे दार न वाजवता दाराच्या खालच्या फटीतून आतील बाजूला सरकवला.

तो कागद पाहिल्यानंतर योगतज्ञ दादाजी यांनी त्या कागदावर साधकाने लिहिलेल्या निरोपाच्या खाली लिहिले, ‘असे बोल खोटे पडतात; म्हणून थोडा वेळ काम आहे’, असे म्हणा.’ काही वेळाने मी योगतज्ञ दादाजी यांच्या खोलीत गेलो. तेव्हा त्यांनी मला सांगितले, ‘‘काहीजण २ मिनिटांसाठी भेट हवी’’, असे सांगतात, तरीही ते वेळेचे भान न ठेवता बोलतच रहातात. काही जण सांगतात, ‘‘आम्ही संध्याकाळी ५ वाजल्यानंतर येतो’’; पण ते ६ वाजून गेल्यानंतरही येत नाहीत. साधक अशा प्रकारे असत्य बोलले, तर ते पुण्यमय शिदोरीत जमा होत नाही. साधकांनी नेहमी सत्य बोलावे. सात्त्विक वृत्तीच्या साधकांनी प्रगती करण्यासाठी सत्याचा बोध घ्यावा.’’

– श्री. अतुल पवार, सनातन आश्रम, रामनाथी, गोवा. (२९.७.२०२४)