‘सकारात्मक किंवा नकारात्मक स्पंदने असलेली विभूती आज्ञाचक्राच्या ठिकाणी लावल्याने व्यक्तीच्या सूक्ष्म-ऊर्जेवर होणारा परिणाम’, या संदर्भातील संशोधन !

‘महर्षि अध्यात्म विश्वविद्यालया’ने ‘यू.ए.एस्. (युनिव्हर्सल ऑरा स्कॅनर)’ या उपकरणाद्वारे केलेली वैज्ञानिक चाचणी

‘देवळे, तीर्थक्षेत्रे, संतांचे मठ किंवा आश्रम इत्यादी ठिकाणी भाविकांना लावण्यासाठी विभूती ठेवली जाते, तसेच विविध धार्मिक विधींच्या वेळी केले जाणारे होमहवन, यज्ञयाग यांची विभूती कपाळावर लावली जाते. घरात आपण प्रतिदिन भक्तीभावाने देवांची पूजा करतांना उद्बत्ती, धूप इत्यादी दाखवतो. त्या वेळची विभूती आपण कपाळावर लावतो. विभूती लावल्यावर सर्वांना चांगले वाटते, तर काहींना चांगल्या अनुभूतीही येतात.

सध्याचे वातावरण अत्यंत रज-तमप्रधान बनले आहे. या वाढलेल्या रज-तमप्रधान स्पंदनांचा नकारात्मक परिणाम वस्तू, वास्तू, व्यक्ती इत्यादींवर अल्प-अधिक प्रमाणात होत असतो. हे आपण दैनंदिन जीवनात अनुभवतो. सकाळी देवपूजा करतांनाची विभूती दिवसभर उघड्यावर राहिल्यास तिच्यावर त्रासदायक स्पंदनांचे आवरण येण्याची शक्यता असते.

आपण देवळात जातो, तेव्हा काही वेळा तेथील थोडी विभूती कागदात बांधून समवेत घरी घेऊन येतो. घरी आल्यावर ही विभूती लगेच डबीत बंद करून सात्त्विक ठिकाणी, उदा. देवघरात ठेवावी, तसेच विभूती शक्यतो वेळेत वापरून संपवावी. काही वेळा आपण एखादी विभूती अनेक दिवस तशीच ठेवून देतो आणि नंतर विसर पडल्याने ती वापरली जात नाही. कालांतराने आठवण झाल्यावर आपण ती वापरतो; पण तसे करतांना ‘विभूतीतील चैतन्य टिकून आहे का ?’, याचा विचार सहसा कुणी करत नाही. विभूतीच्या संदर्भातील एक संशोधन पुढे दिले आहे.

‘सकारात्मक किंवा नकारात्मक स्पंदने असलेली विभूती आज्ञाचक्राच्या ठिकाणी म्हणजे दोन भुवयांच्या मध्ये लावल्याने व्यक्तीच्या सूक्ष्म-ऊर्जेवर काय परिणाम होतो आणि तो किती काळ टिकतो ?’, हे विज्ञानाद्वारे अभ्यासण्यासाठी ‘महर्षि अध्यात्म विश्वविद्यालया’च्या वतीने एक चाचणी करण्यात आली. या चाचणीसाठी ‘यू.ए.एस्. (युनिव्हर्सल ऑरा स्कॅनर)’ या उपकरणाचा उपयोग करण्यात आला. या उपकरणाद्वारे वस्तू, वास्तू आणि व्यक्ती यांच्यातील नकारात्मक अन् सकारात्मक ऊर्जा मोजता येते.

(भाग १)

१. चाचणीतील विभूतींच्या नोंदी

या चाचणीत ३ प्रकारच्या विभूतींच्या ‘यू.ए.एस्. (युनिव्हर्सल ऑरा स्कॅनर)’ या उपकरणाद्वारे चाचण्या करण्यात आल्या. पुढे दिलेल्या नोंदींतून लक्षात येते की, ‘विभूती क्र. १’ मध्ये सकारात्मक ऊर्जा काहीच नसून नकारात्मक ऊर्जा आहे. ‘विभूती क्र. २’ मध्ये सकारात्मक आणि नकारात्मक या दोन्ही प्रकारच्या ऊर्जा आहेत. ‘विभूती क्र. ३’ मध्ये नकारात्मक ऊर्जा काहीच नसून सकारात्मक ऊर्जा आहे.

‘या तीनही प्रकारच्या विभूती आज्ञाचक्रावर लावल्याने व्यक्तीच्या सूक्ष्म-ऊर्जेवर काय परिणाम होतो ?’, हे अभ्यासण्यासाठी काही संशोधनात्मक प्रयोग करण्यात आले. या प्रयोगात पुढील ५ साधक सहभागी होते.

अ. तीव्र आध्यात्मिक त्रास (टीप १) असलेली व्यक्ती

आ. आध्यात्मिक त्रास नसलेली व्यक्ती

इ. तीव्र आध्यात्मिक त्रास असलेली आणि ६० टक्क्यांपेक्षा अधिक आध्यात्मिक पातळीची (टीप २) व्यक्ती

ई. आध्यात्मिक त्रास नसलेली अन् ६० टक्क्यांपेक्षा अधिक आध्यात्मिक पातळीची व्यक्ती

उ. ‘सनातनचे दुसरे बालसंत’ पू. वामन राजंदेकर (वय ५ वर्षे)

निर्जीव वस्तू म्हणजे १ टक्का आणि ईश्वर म्हणजे १०० टक्के आध्यात्मिक पातळी, असे गृहित धरून त्या तुलनेत व्यक्तीच्या आध्यात्मिक प्रगतीनुसार तिची वर्तमान आध्यात्मिक पातळी निश्चित करता येते. एका संतांना समष्टी कार्याच्या आवश्यकतेनुसार साधकांच्या आध्यात्मिक पातळीविषयी ध्यानातून उत्तरे मिळतात. त्याविषयीचे लिखाण ‘सनातन प्रभात’ नियतकालिकांत वेळोवेळी प्रसिद्ध करण्यात येते.

२. संशोधनात्मक प्रयोगांतील ४ व्यक्ती आणि १ बालसंत यांच्या नोंदी

पहिल्या प्रयोगात सर्वांना आज्ञाचक्रावर (दोन भुवयांच्या मध्ये) लावण्यासाठी ‘विभूती क्र. १’ देण्यात आली. त्यानंतर दुसर्‍या आणि तिसर्‍या प्रयोगात त्यांना अनुक्रमे ‘विभूती क्र. २’ अन् ‘विभूती क्र. ३’ आज्ञाचक्रावर लावण्यासाठी देण्यात आल्या. प्रत्येक प्रयोगात ‘विभूती लावण्यापूर्वी’, ‘विभूती लावल्यावर लगेच’, ‘विभूती लावून १५ मिनिटे झाल्यावर’ आणि ‘विभूती लावून १ घंटा झाल्यावर’ अशा एकूण ४ टप्प्यांत सर्वांची छायाचित्रे काढून ‘यू.ए.एस्. (युनिव्हर्सल ऑरा स्कॅनर)’ या उपकरणाद्वारे चाचण्या करण्यात आल्या. या चाचण्यांतील नोंदींचे विवेचन पुढे दिले आहे.

२ अ. ‘विभूती क्र. १’ (नकारात्मक स्पंदने असलेली विभूती) लावल्याचा सर्वांवर नकारात्मक परिणाम होणे आणि तो अनुमाने १ घंटा टिकून रहाणे

वरील नोंदींच्या तुलनात्मक अभ्यासातून पुढील सूत्रे लक्षात आली.

१. तीव्र आध्यात्मिक त्रास असलेल्या व्यक्तीमध्ये सकारात्मक ऊर्जा आढळली नाही. विभूती लावल्यानंतर तिच्यातील नकारात्मक ऊर्जेत थोडी वाढ झाली. विभूती लावल्यानंतर १५ मिनिटांनी तिच्यातील नकारात्मक ऊर्जा पुष्कळ वाढली.

२. विभूती लावल्यानंतर अन्य ३ व्यक्तींतील नकारात्मक ऊर्जेत वाढ होऊन त्यांच्यातील सकारात्मक ऊर्जा घटली. विभूती लावल्यानंतर १५ मिनिटांनी तिघांतील नकारात्मक ऊर्जा आणखीन वाढली आणि त्यांच्यातील सकारात्मक ऊर्जा नाहीशी झाली.

३. विभूती लावल्यानंतर बालसंतांमधील नकारात्मक ऊर्जेत अत्यल्प प्रमाणात वाढ झाली आणि त्यांच्यातील सकारात्मक ऊर्जा पुष्कळ घटली. विभूती लावल्यानंतर १५ मिनिटांनी त्यांच्यातील नकारात्मक ऊर्जेत थोडी वाढ होऊन त्यांच्यातील सकारात्मक ऊर्जा आणखीन घटली.

४. सर्वांवर विभूतीचा नकारात्मक परिणाम विभूती लावल्यानंतर १५ मिनिटांनी पूर्णपणे दिसून आला.

५. या विभूतीचा नकारात्मक परिणाम सर्वांवर अनुमाने १ घंटा टिकला.

३. निष्कर्ष

नकारात्मक स्पंदने असलेली विभूती लावल्याने सर्वांच्या सूक्ष्म-ऊर्जेवर नकारात्मक परिणाम झाले आणि ते अनुमाने १ घंटा टिकून राहिले. यातून विभूतीमध्ये नकारात्मक (त्रासदायक) स्पंदने असतील, तर व्यक्तीला आध्यात्मिकदृष्ट्या लाभ होण्याऐवजी हानी होते, हे लक्षात येते.’

(क्रमशः पुढच्या रविवारी)

– सौ. मधुरा धनंजय कर्वे, महर्षि अध्यात्म विश्वविद्यालय, गोवा. (७.९.२०२४)

इ-मेल : mav.research2014@gmail.com

या लेखाचा पुढील भाग वाचण्यासाठी येथे क्लिक करा – https://sanatanprabhat.org/marathi/852870.html