अकलूज (सोलापूर) येथे गोवंशीय जनावरांचे ५५ किलो मांस आणि १९ जर्सी गोवंशीय जनावरे जप्त !

अकलूज (जिल्हा ग्रामीण सोलापूर), २५ ऑक्टोबर (वार्ता.) – अकलूज येथील होनमाने प्लॉट येथे जनावरांची कत्तल झालेली आहे, अशी बातमी २२ ऑक्टोबर या दिवशी गोरक्षक अक्षय कांचन, ऋषिकेश दसवडकर, अभिषेक मुळे, नीलेश अनपूर आणि वैभव खरात यांना मिळाली. तेथे गेले असता त्यांना ४-५ जण सौदागर कुरेशी यांच्या बंद घराजवळ उघड्यावर जर्सी जनावरे कापत होते. गोरक्षकांना पाहून ते पळून गेले. जवळच असलेल्या चिराक्षली बाबा दर्ग्याजवळ खिडकीला ७ जर्सी जनावरे, तसेच एका शेडमध्ये २ जर्सी जनावरे कत्तलीसाठी बांधलेली होती. ही जनावरे अदिल कुरेशी, नजीर सौदागर, अजय मोरे यांची होती. गोरक्षकांनी ३० किलो जनावरांचे मांस आणि ९ जर्शी गायी पोलिसांच्या कह्यात दिल्या.

अकलुज येथील व्हनमाने प्लॉट, कुरेशी गल्ली येथे अजित मोरे यांच्या घराजवळ एका पत्र्याच्या शेडमध्ये गोवंशीय जनावरांची कत्तल चालू आहे, अशी बातमी पोलिसांना मिळाली होती. त्या ठिकाणी गेल्यावर कबीर मोरे आणि इतर ३ जण जनावरांची हत्या करत होते. पोलिसांना बघून जनावरांचे मांस तेथेच सोडून ते पळून गेले. वरील दोन्ही कारवायांमध्ये एकूण ५५ किलो गोवंशीय जनावरांचे मांस आणि १९ जर्सी गोवंशीय जनावरे मिळाली आहेत. या प्रकरणी श्रीराम पोरे यांनी कबीर मोरे, अदिल कुरेशी, नजीर सौदागर, अजय मोरे आणि अन्य ५ अनोळखी लोकांविरुद्ध अकलूज पोलीस ठाण्यात तक्रार प्रविष्ट केली आहे.