रायरेश्वर येथे दुर्ग स्वच्छता आणि संवर्धन मोहीम !

‘श्री शिवमुद्रा फाउंडेशन महाराष्ट्र राज्य दुर्गसेवक संस्थे’च्या वतीने आयोजन

पुणे – ‘श्री शिवमुद्रा फाउंडेशन महाराष्ट्र राज्य’ या दुर्गसेवक संस्थेच्या अंतर्गत १४ वी स्वच्छता, संवर्धन मोहीम श्रीमान रायरेश्वर येथे १४ ऑक्टोबरला राबवण्यात आली. या वेळी २०० युवक-युवती यांनी या मोहिमेत सहभाग घेतला. दिवसभर कष्ट घेऊन श्री रायरेश्वर गड स्वच्छ करण्याचा प्रयत्न केला. या वेळी श्रीमान रायरेश्वराचा महारुद्राभिषेक, देश आणि धर्मभक्ती जागृत करणारी गीते आणि शिववंदना घेण्यात आली. शेवटी महाप्रसाद घेऊन मोहिमेची सांगता झाली.

या वेळी श्री शिवप्रतिष्ठान हिंदुस्थान भोर, खंडाळा विभागातील धारकरी, सह्याद्री प्रतिष्ठान, नरवीर तानाजीराव मालुसरे प्रतिष्ठान कासुर्डी, सरदार कृष्णाजीराजे नाईक बांदल देशमुख प्रतिष्ठान (बांदलसेना) यांचे शिवभक्त मोठ्या संख्येने उपस्थित होते.