साडेसात कोटी रुपयांची हानीभरपाई मिळण्यासाठी महापालिका दावा करणार !

संगीतसूर्य केशवराव भोसले नाट्यगृहातील आगीच्या घटनेच्या चौकशीसाठी समितीची स्थापना !

कोल्हापूर – संगीतसूर्य केशवराव भोसले नाट्यगृहातील आगीच्या घटनेच्या चौकशीसाठी प्रशासक के. मंजूलक्ष्मी यांनी तातडीने समिती स्थापन केली आहे. यात अतिरिक्त आयुक्त राहुल रोकडे, शहर अभियंता नेत्रदीप सरनोबत, जलअभियंता हर्षजीत घाटगे, मुख्य अग्नीशमन अधिकारी मनीष रणभिसे यांची नियुक्ती केली आहे. खासबाग मैदानाच्या मागील बाजूस ही आग लागल्याचे प्रत्यक्ष दर्शीने सांगितले आहे. त्यामुळे आग नेमकी कशामुळे लागली ? याची चौकशी तातडीने या समितीच्या वतीने करण्यात येणार आहे.

या आगीच्या संदर्भात पोलीस ठाण्यात तक्रार प्रविष्ट करण्याच्या सूचना देण्यात आल्या आहेत. महापालिकेने केशवराव भोसले नाट्यगृहाचा विमा उतरवला असून साधारणत: साडेसात कोटी रुपयांची हानीभरपाई मिळण्यासाठी दावा केला जाणार आहे, असे सांगितले.

केशवराव भोसले नाट्यगृहात ९ ऑगस्टला जयंती महोत्सव आयोजित करण्यात आला होता. त्यासाठी जय्यत सिद्धता करण्यात आली होती; मात्र आदल्या दिवशीच ही दुर्घटना घडली. घटना घडल्याचे कळल्यावर राज्य नियोजन महामंडळाचे अध्यक्ष श्री. राजेश क्षीरसागर यांनी रात्रीच भेट देऊन याच्या पुनर्उभारणीसाठी १० कोटी रुपयांचे साहाय्य देण्याची घोषणा केली.

मुख्यमंत्री एकनाथ शिंदे यांनी ९ ऑगस्टला या संदर्भातील संपूर्ण माहिती घेऊन ‘जुने बांधकाम’ कायम ठेवून नाट्यगृहाची उभारणी केली जाईल. महापालिकेने ८ दिवसांत त्या संदर्भातील अहवाल सादर करावा, अशा सूचना केल्या. राज्य सरकारच्या नियोजन विभागाच्या सचिवांनी महापालिकेच्या प्रशासक के. मंजूलक्ष्मी यांच्याकडून दूरभाषद्वारे याची सविस्तर माहिती घेतली.