देवद, पनवेल येथील श्रीमती स्मिता नवलकर (वय ७१ वर्षे) यांच्याकडील ‘परात्पर गुरु डॉ. जयंत आठवले यांचे सूक्ष्मातील कार्य आणि आध्यात्मिक संशोधन’ या ग्रंथात झालेले पालट !

१. वाईट स्वप्न पडल्यानंतर २ दिवसांनी ग्रंथावर ओरखडे उमटलेले दिसणे

‘वर्ष २०२२ मध्ये हिंदु राष्ट्र अधिवेशनाला येतांना मी ‘परात्पर गुरु डॉ. जयंत आठवले यांचे सूक्ष्मातील कार्य आणि आध्यात्मिक संशोधन’ हा ग्रंथ आध्यात्मिक लाभांसाठी समवेत आणला होता. मला एका रात्री एक स्वप्न पडले. त्यामध्ये ‘माणसांचा एक मोठा समूह माझ्यावर आक्रमण करत आहे’, असे मला दिसले. त्या वेळी ‘गुरुदेव, प.पू. गुरुदेव, परम पूज्य’, असे ओरडत मी त्यांना ढकलून देत आहे’, असे दृश्य मला दिसले. दोन दिवसांनी मला नामजप करतांना या ग्रंथावर प्लास्टिकचे आच्छादन असतांनाही ओरखडे उमटलेले दिसले. मी ते गुरुदेवांना दाखवले. त्यांनी ते पाहिले आणि मला परत दिले. ते म्हणाले, ‘‘नामजपादी उपाय करा.’’ त्यानंतर नियमित हा ‘जीवनदर्शन’ ग्रंथ मी माझ्या उशाशी ठेवून नामजपादी उपाय करत होते.

२. ग्रंथातून चैतन्य आणि प्रकाश प्रकाशित झाल्याचे जाणवणे

जून-जुलै २०२२ या मासांपासून मला होणार्‍या पोटाशी संबंधित त्रासांमध्ये वाढ झाली. सप्टेंबर २०२२ मध्ये माझ्यावर शस्त्रक्रिया करण्यात आली. हा ग्रंथ रुग्णालयातही माझ्या समवेत होता. गेल्या जूनपासून यातून पुष्कळ चैतन्य आणि प्रकाश प्रकाशित होतो. त्याचा रंग हळूहळू फिकट होतो. कधी पिवळसर रंग अधिक जाणवतो, तर कधी पांढरा प्रकाश जाणवतो. गेल्या २ मासांपासून यातील रंगांमध्ये अल्प-अधिक प्रमाणात पालट होत आहेत. इकडे रामनाथी आश्रमात येण्यापूर्वी येण्याच्या एक आठवड्यापूर्वी मला त्यात पुष्कळ पालट जाणवत होते आणि आध्यात्मिक लाभही होत होते.’

– श्रीमती स्मिता नवलकर (आध्यात्मिक पातळी ६० टक्के, वय ७१ वर्षे), सनातन आश्रम, देवद, पनवेल. (२४.६.२०२३)