तिरुचेंदूर (तमिळनाडू) येथील सुब्रह्मण्यस्वामी मंदिरात सनातन संस्थेच्या श्रीचित्‌शक्ति (सौ.) अंजली मुकुल गाडगीळ यांच्या उपस्थितीत पार पडला ‘सुब्रह्मण्य होम’ !

तिरुचेंदूर (तमिळनाडू) – येथील सुब्रह्मण्यस्वामी, म्हणजेच कार्तिकेयच्या मंदिरात सनातन संस्थेच्या श्रीचित्‌शक्ति (सौ.) अंजली मुकुल गाडगीळ यांच्या उपस्थितीत ११ जुलै या दिवशी ‘सुब्रह्मण्य होम’ पार पडला. ७ जुलै २०२४ या दिवशी चेन्नई येथे झालेल्या नाडीपट्टी वाचनामध्ये महर्षींनी सांगितले, ‘सध्या साधकांवर सूक्ष्मातील अनिष्ट शक्तींची आक्रमणे वाढली आहेत. त्यामुळे साधकांचे शारीरिक त्रास वाढले आहेत. साधकांचे सूक्ष्मातील आक्रमणांपासून रक्षण होण्यासाठी श्रीचित्‌शक्ति (सौ.) अंजली गाडगीळ यांनी कार्तिकेय देवाला प्रार्थना करावी, तसेच त्यांच्या उपस्थितीत तिरुचेंदूर (तमिळनाडू) येथील सुब्रह्मण्यस्वामी मंदिरात जाऊन ‘सुब्रह्मण्य होम’ करावा.’ महर्षींच्या आज्ञेनुसार ११ जुलै या दिवशी दुपारी ३ ते सायंकाळी ६.३० या वेळेत श्रीचित्‌शक्ति (सौ.) अंजली गाडगीळ यांच्या उपस्थितीत ‘सुब्रह्मण्य होम’ पार पडला. या वेळी मंदिराचे पारंपरिक पुजारी श्री. महाराजा लक्ष्मी अय्यर यांनी पूजा आणि होम यांची सिद्धता केली होती.

मयुरावर आसनस्थ शत्रूसंहारक कार्तिकेयाच्या मूर्तीसमोर पूजाविधी संपन्न झाला. प्रारंभी श्री गणपती पूजन आणि नंतर नवग्रह पूजा झाली. त्याआधी श्रीचित्‌शक्ति (सौ.) अंजली गाडगीळ गर्भगृहात जाऊन श्री सुब्रह्मण्यस्वामीदेवाकडे संकल्प आणि प्रार्थना करून आल्या. ६ वेद ब्राह्मणांनी पूजाविधी केले आणि नंतर शत्रूसंहार मूर्तीला अभिषेक करण्यात आला.