२ विमानांची धडक थोडक्यात टळली !

मुंबई आंतरराष्ट्रीय विमानतळावरील घटना !

मुंबई – ९ जून या दिवशी सकाळी मुंबई आंतरराष्ट्रीय विमानतळावर इंदौरहून आलेल्या इंडिगोच्या एका प्रवासी विमानाला मुंबई विमानतळावरील कर्मचार्‍यांनी लँडिंगची (उतरण्याची) अनुमती दिली; पण त्याच वेळी त्याच धावपट्टीवरून काही अंतरावरून एअर इंडिया ३५० हे विमान उड्डाण घेत होते. दोन्ही विमानांच्या ‘लँडिंग’ (उतरणे) आणि ‘टेक-ऑफ्’ (उड्डाण करणे) यांत काही क्षणांचे अंतर होते. ही वेळ थोडी जरी पुढे-मागे झाली असती, तर दोन्ही विमानांची एकमेकांना धडक बसली असती. या प्रकरणी डीजीसीएने (नागर विमानन महानिदेशनालयने) त्या कालावधीत कर्तव्य बजावणार्‍या कर्मचार्‍यांना तात्पुरत्या वेळापत्रकातून हटवले.