राज्य मानवाधिकार आयोगाचे अध्यक्ष न्यायमूर्ती तातेड यांच्याकडून पोलिसांना समन्स !

बुलढाणा जिल्ह्यातील पीर सैलानी बाबाच्या दर्ग्यातील मनोरुग्णांचे प्रकरण

मुंबई – बुलढाणा जिल्ह्यातील पीर सैलानी बाबाच्या दर्गामध्ये मनोरुग्ण आणि मानसिक आजारी व्यक्तींवर अमानवी पद्धतीने उपचार होत होते. याविषयी वृत्त प्रसिद्ध झाल्यानंतर राज्य मानवाधिकार आयोगाचे अध्यक्ष न्यायमूर्ती के.के. तातेड यांनी हा विषय ‘सुओ मोटो’ विचारार्थ प्रविष्ट करून घेत राज्याचे मुख्य सचिव, पोलीस महासंचालक, तसेच बुलढाणा जिल्ह्याचे जिल्हाधिकारी, पोलीस अधीक्षक आणि मुख्य कार्यकारी अधिकारी यांना समन्स जारी केले आहे.

‘या संपूर्ण प्रकरणाची वस्तूस्थिती तपासावी. पीडित रुग्णांना मिळालेल्या अमानवी वागणुकीविषयी यापूर्वी कोणतीही कारवाई करण्यात आली आहे का ? असेल तर त्याचा तपशील द्यावा आणि नसेल तर त्याचे कारण द्यावे, तसेच बुलढाणा जिल्ह्यात मनोरुग्णांवरील वैद्यकीय उपचारांची व्यवस्था आहे का ? असेल तर संबंधित रुग्णालयाची क्षमता किती आहे ?’, या प्रश्नांची उत्तरे देण्याचे निर्देश न्या. तातेड यांनी दिले आहेत.