PM MODI : ख्रिस्ती समाजाच्या सहकार्यानेच गोव्यात भाजपचे सरकार ! – पंतप्रधान नरेंद्र मोदी

पणजी, २१ एप्रिल (वार्ता.) : गोव्यात अनेक वर्षे भाजपचे सरकार आहे. येथील ख्रिस्ती समाजाने नेहमी आम्हाला पाठिंबा दिला आहे. त्यांचे साहाय्य आणि सहकार्य यांमुळेच गोव्यात दशकभर आमचे सरकार आहे. यामुळे ‘ख्रिस्ती समाज भाजपला पाठिंबा देत नाही’, असे म्हणता येणार नाही; मात्र भाजपला यासाठी अधिक काम करण्याची आवश्यकता आहे आणि ते काम आम्ही करत आहोत, असे मत पंतप्रधान नरेंद्र मोदी यांनी व्यक्त केले. पंतप्रधान नरेंद्र मोदी एका राष्ट्रीय वृत्तवाहिनीशी बोलत होते.

ते पुढे म्हणाले, ‘‘ईशान्येकडील राज्यात ख्रिस्ती मतदार अधिक आहेत. त्यांच्या मतांमुळेच तेथेही आमचे सरकार येत आहे. तेथे आमचे काही मुख्यमंत्री किंवा अन्य मंत्री ख्रिस्ती समाजाचे आहेत. केरळमध्ये बूथपासून मोठ्या स्तरावर आमचे नेते आहेत. ख्रिस्ती समाजाचे नेते किंवा बिशप यांना मी वेळोवेळी भेटत असतो. मी स्वत:ही नाताळ मोठ्या उत्साहाने साजरा करतो.’’