पुणे येथे ‘नूतन मराठी विद्यालया’तील इयत्ता ९ वीच्या विद्यार्थ्यांस शिक्षिकेकडून लाथा-बुक्क्यांनी मारहाण !

सामाजिक माध्यमांमध्ये चित्रफीत प्रसारित झाल्यानंतर पालकांना समजले

पुणे – शहरातील अत्यंत जुन्या आणि नामवंत ‘शिक्षण प्रसारक मंडळी’ या शिक्षण संस्थेच्या बाजीराव रस्त्यावरील ‘नूतन मराठी विद्यालया’मध्ये इयत्ता ९ वीमध्ये शिकणार्‍या विद्यार्थ्यास पूजा सुनील केदारी या शिक्षिकेने बेदम मारहाण केली. ही शिक्षिका विद्यार्थ्यास लाथा-बुक्क्यांनी मारहाण करत असलेली चित्रफीत सामाजिक माध्यमांतून प्रसारित झाल्यानंतर सदरचा प्रकार पालकांना समजला. त्यानंतर पालकांकडून ८ एप्रिल या दिवशी विश्रामबाग पोलीस ठाण्यात शिक्षिकेच्या विरोधात तक्रार प्रविष्ट करण्यात आली आहे. ही घटना ७ मार्च या दिवशी घडली होती.

पीडित मुलगा ‘नूतन मराठी विद्यालया’मध्ये इयत्ता ९ वीमध्ये शिकतो. ७ मार्च या दिवशी तो नेहमीप्रमाणे शाळेत गेला. वर्गामध्ये सर्व मुले एकमेकांशी घोळका करून बोलत होती. त्याच वेळी शिक्षिका वर्गामध्ये आल्या. त्यांनी पीडित मुलाच्या जवळ जाऊन कसलीही विचारपूस न करता लाथा-बुक्क्यांनी बेदम मारहाण करण्यास प्रारंभ केला, असे तक्रारींमध्ये नमूद केले आहे.