भिंड (मध्यप्रदेश) येथील संघाच्या कार्यालयात सापडला बाँब !
भिंड (मध्यप्रदेश) – येथील हनुमान बाजारिया या निवासी भागात असलेल्या राष्ट्रीय स्वयंसेवक संघाच्या कार्यालयात २४ फेब्रुवारीच्या रात्री पिन बाँब सापडला. पिन बाँब हा बाँब ग्रेनेड बाँबसारखा दिसतो. रात्री १२ वाजण्याच्या सुमारास कार्यालयाचे काम पहाणारे स्वयंसेवक राम मोहन यांच्या माहितीवरून पोलीस अधीक्षक असित यादव यांनी पथकासह घटनास्थळी पोचून बाँब कह्यात घेतला.
पोलिसांनी दिलेल्या माहितीनुसार हा बाँब पुष्कळ जुना आहे. काही दिवसांपूर्वी संघाचे कार्यालय मातीने भरले होते. कुंवरी नदीच्या खोर्‍यातून ही माती आणण्यात आली. सुमारे ३० वर्षांपूर्वी येथे ‘फायरिंग रेंज’चा (सुरक्षादलांचा गोळीबाराचा सराव करण्याचा परिसर) परिसर होता. हा बाँब त्या वेळी मातीत गाडला गेला असावा आणि आता तो मातीसह या कार्यालयात आला असल्याची शक्यता वर्तवली जात आहे.