नागपूर येथे १२ हून अधिक महिलांचे व्हिडिओ चित्रीत करणार्‍या विकृत शिक्षकाला अटक !

नागपूर – येथील एका शाळेच्या शिक्षकाला शौचालयाच्या खिडकीतून महिलांचे व्हिडिओ बनवल्याप्रकरणी अटक करून त्याचा भ्रमणभाष संच जप्त केला आहे. मंगेश खापरे (३७ वर्षे) असे आरोपीचे नाव आहे. तो कासारपुरा येथील रहिवासी असून एका खासगी शाळेत कला शिक्षक होता. २७ ते २९ जानेवारी या कालावधीत नागपूर  विद्यापिठात आयोजित ‘ॲडव्हांटेज विदर्भ’ या औद्योगिक प्रदर्शनात तो सहभागी झाला होता. एका महिलेला त्याच्या कृत्याविषयी समजल्यावर तिने आयोजकांकडे त्याची तक्रार केली. त्याने महिलांचे १२ हून अधिक व्हिडिओ बनवल्याचा आरोप आहे.

आरोपी खापरे याने यापूर्वीही अनेकदा असे केले होते. त्याने सार्वजनिक शौचालयातील महिलांचे व्हिडिओ ध्वनीचित्रमुद्रित केले होते. त्याच्या भ्रमणभाषमध्ये असे ३० व्हिडिओ सापडले आहेत. ते त्याने वर्ष २०२२ मध्ये रेकॉर्ड केले होते. पोलिसांनी आरोपीच्या विरोधात विविध कलमांतर्गत गुन्हा नोंद केला; पण स्थानिक न्यायालयाने त्याला जामीन मान्य केला. आरोपी मनोरुग्ण असल्याचा पोलिसांचा अंदाज आहे.