दिवसभरातील घडामोडींवर एक दृष्टीक्षेप : नागपूर येथे शेकोटीत भावडांचा होरपळून मृत्यू; गडचिरोली येथे वाघिणीला पकडले…

नागपूर येथे शेकोटीत भावडांचा होरपळून मृत्यू

नागपूर – आई-वडील घरात नसतांना ३ मुलांनी शेकोटी पेटवल्यानंतर घराला आग लागली. ही आग घरात पसरल्याने संपूर्ण घराने पेट घेतला. या आगीत ७ आणि ३ वर्षीय भावडांचा मृत्यू झाला. एक १० वर्षीय मुलगी घरातून बाहेर आल्याने वाचली.

गडचिरोली येथे वाघिणीला पकडले

गडचिरोली – येथील दक्षिण भागातील २ महिलांचा बळी घेणार्‍या वाघिणीला वन विभागाने जेरबंद केले आहे.

महाराष्ट्रात गारठा वाढला !

नागपूर – उत्तरेकडील राज्यांमध्ये असलेल्या थंडीच्या लाटेचा परिणाम होऊन राज्यात अनेक ठिकाणी वातावरण कोरडे झाले आहे. मध्य आणि उत्तर महाराष्ट्रात किमान तापमानात घट झाल्याने थंडीचा कडाका वाढला आहे. ‘पुढील २ दिवस ही थंडी कायम राहील’, असे भारतीय हवामान विभागाने सांगितले आहे.

सार्वजनिक आरोग्य विभागाच्या प्रयोगशाळा होणार अद्ययावत् !

मुंबई – रासायनिक आणि अणुजीवीयदृष्ट्या पाणी आणि अन्नपदार्थ नमुन्यांच्या पडताळणीसाठी राज्यामध्ये सार्वजनिक आरोग्य विभागाच्या ३५ पैकी २२ प्रादेशिक सार्वजनिक आरोग्य प्रयोगशाळा अद्ययावत् करण्याचा निर्णय राज्य सरकारने घेतला आहे !