मांढरदेव (ता. वाई) येथील श्री काळूबाई यात्रेच्या वेळी कलम ३६ लागू !

सातारा – मांढरदेव (ता. वाई) येथील श्री काळूबाई मांढरदेवी यात्रेनिमित्त २४ जानेवारी ते ९ फेब्रुवारी या कालावधीत कलम ३६ लागू करण्यात आले आहे. त्यानुसार पशूबळी देण्यास आणि वाद्य वाजवण्यास मनाई करण्यात आली असल्याची माहिती सातारा जिल्हा पोलीस अधीक्षक समीर शेख यांनी दिली. (पोलीस अधिकारी शेख असे कलम इतर धर्मियांच्या उत्सवांच्या वेळी लागू करतील का ? बकरी ईदच्या वेळी पशूबळी देण्यास ते मनाई करतील का ? – संपादक)

समीर शेख पुढे म्हणाले की, मुंबई पोलीस अधिनियम १९५१ चे कलम ३६ नुसार असलेल्या अधिकाराचा वापर करून कायदा आणि सुव्यवस्थेच्या बंदोबस्तासाठी नेमलेल्या सर्व संबंधित पोलीस अधिकारी अन् त्यांच्याहून वरिष्ठ पोलीस अधिकारी यांना हे अधिकार प्रदान केले आहेत. हे अधिकार पोलीस ठाणे हद्दीतील जनतेचे आरोग्य, सुरक्षा आणि कायदा आणि सुव्यवस्था अबाधित रहावी म्हणून प्रदान करण्यात आले आहेत.