देहली येथील सुगम गायिका श्रीमती सुमन देवगण यांची महर्षि अध्यात्म विश्वविद्यालयाच्या संशोधन केंद्राला भेट !

श्रीमती सुमन देवगण यांची रामनाथी येथील सनातनच्या आश्रमाला भेट !

रामनाथी – देहली येथील सुगम गायिका श्रीमती सुमन देवगण यांनी २७ नोव्हेंबर २०२३ या दिवशी रामनाथी येथील सनातनच्या आश्रमाला भेट दिली. या वेळी साधक श्री. प्रशांत कोयंडे यांनी त्यांना आश्रमात चालू असलेल्या विविध कार्याची आणि इतर माहिती दिली.

श्रीमती सुमन देवगण यांना आलेली अनुभूती

आश्रमातील भिंतीला हात लावल्यावर मला पुष्कळ थंडावा जाणवला, मन एकदम स्थिर झालेले लक्षात आले, तसेच ‘तळहातांमधून काहीतरी स्पंदने माझ्या संपूर्ण शरिरात पसरत आहेत’, असे जाणवले. आश्रम केवळ अद्भुतच आहे. याच्या वर्णनासाठी माझ्याकडे काही शब्दच नाहीत.

– श्रीमती सुमन देवगण

फोंडा – देहली येथील सुगम गायिका श्रीमती सुमन देवगण यांनी २७ नोव्हेंबरला महर्षि अध्यात्म विश्वविद्यालयाच्या संशोधन केंद्राला भेट दिली. या वेळी त्यांना महर्षि अध्यात्म विश्वविद्यालयाच्या संगीत समन्वयक सुश्री (कु.) तेजल पात्रीकर यांनी महर्षि अध्यात्म विश्वविद्यालयाचे कार्य सविस्तरपणे सांगितले. त्यांना वेगवेगळ्या क्षेत्रांमध्ये विश्वविद्यालय करत असलेल्या विविध संशोधनाची माहिती श्री. आशिष सावंत यांनी दिली.

महर्षि अध्यात्म विश्वविद्यालयाचे एकूण कार्य पाहून त्यांनी ‘आजच्या काळासाठी आवश्यक असेच कार्य गुरुदेव (सच्चिदानंद परब्रह्म डॉ. जयंत आठवले) करत आहेत. याची आजच्या पिढीसाठी पुष्कळ आवश्यकता आहे’, असे मनोगत व्यक्त केले.

संशोधन केंद्रातील सकारात्मक ऊर्जा आणि सात्त्विकता अनुभवल्यावर त्या म्हणाल्या, ‘‘आम्ही ज्या वेळी संगीत शिकायचो, त्या वेळी गुरूंच्या ज्या खोलीत आम्ही शिकायचो तिथे सतत गायनाचा रियाज केल्याने सकारात्मक स्पंदने निर्माण व्हायची आणि त्यामुळे अधिक चांगले वाटायचे. अशा ठिकाणी स्वर लावतांना वेगळेच म्हणजे दैवी जाणवायचे; परंतु येथे तर संशोधन केंद्राचा प्रत्येक कोपरा सात्त्विक आहे. त्यामुळे या वास्तूमध्ये कुठल्याही स्थानी स्वर लावला, तरी तुम्हाला तीच सात्त्विकता, तोच दैवीपणा अनुभवायला मिळू शकतो, असे मला वाटते.’’

‘या संशोधन केंद्रातून परत जावेसेच वाटत नाही. मी पुन्हा लवकरच येथे येईन’, असेही त्या जातांना म्हणाल्या.

– सुश्री (कु.) तेजल पात्रीकर, संगीत समन्वयक, महर्षि अध्यात्म विश्वविद्यालय, गोवा.