Exclusive : एस्.टी. महामंडळाच्या मुख्य इमारतीचा भाग ढासळला !

बांधकामाचा प्रस्ताव ८ वर्षांपासून रखडला !

मुंबई, १५ नोव्हेंबर (वार्ता.) – मुंबई सेंट्रल येथे असलेले एस्.टी. महामंडळाचे मुख्यालयाचे काही बांधकाम अक्षरश: ढासळले आहे. इमारतीच्या तळमजल्यापासून ते शेवटच्या चौथ्या मजल्यापर्यंत ठिकठिकाणी इमारतीचे बांधकाम तुटले आहे. गंभीर स्थिती असूनही मागील ८ वर्षांपासून या इमातीच्या बांधकामाचा प्रस्ताव रखडला आहे.

वर्ष २०१६ मध्ये एस्.टी.च्या मुख्यालयाच्या नूतनीकरणाचा ५५० कोटी रुपयांचा प्रस्ताव सिद्ध करण्यात आला होता. या इमारतीचा आराखडाही सिद्ध करण्यात आला. इमारत स्वत: बांधून त्यामधील काही मजले भाड्याने देण्याचे निश्‍चित करण्यात आले. राज्यात शिवसेना-भाजप महायुतीचे सरकारच्या काळात दिवाकर रावते परिवहनमंत्री असतांना हा प्रस्ताव अंतिमही करण्यात आला. त्यानंतर इमारतीच्या बांधकामासाठी एकदा निविदाही काढण्यात आल्या; मात्र या निविदा रहित करण्यात आल्या. त्यानंतर अद्याप याविषयी गतीने कार्यवाही झालेली नाही.

भाडेतत्त्वाचे धोरण अद्यापही अनिश्‍चित !

नवीन इमारतीमधील सदनिका भाड्याने देतांना ३० वर्षांसाठी द्याव्यात कि ६० वर्षांसाठी द्याव्यात ? याविषयी मतांतरे आहेत. अनेक मास होऊनही याविषयीचे धोरण निश्‍चित करण्यात आलेले नाही.