समर्थनगर, नरडवे रोड येथील ‘बियर बार’ची अनुमती रहित करण्याची नागरिकांची मागणी
रहिवासी क्षेत्रात ‘बियर बार’ला विरोध करणार्‍या नागिरकांचे अभिनंदन !
कणकवली – स्थानिक रहिवाशांशी कोणत्याही प्रकारची चर्चा न करता समर्थनगर, नरडवे रोड येथे ‘बियरबार आणि परमिट रूम’ला (मद्यालयाला) अनुमती मिळाल्याचे समजते. येथे ‘परमिट रूम आणि बियरबार’ चालू करण्यास आमचा आक्षेप असून यासाठी दिलेली अनुमती रहित करावी, अशी मागणी येथील रहिवाशांनी जिल्हाधिकारी यांच्याकडे निवेदनाद्वारे केली आहे.
समर्थनगर येथे ५ इमारती असून अनेक बंगले आहेत. येथील वातावरण शांततापूर्ण असून सर्व सुशिक्षित लोकांची वस्ती आहे. येथून जवळ ‘पोदार इंग्लिश माध्यमाची शाळा’ आहे. मुलांचा येण्या-जाण्याचा मार्ग आणि बसथांबा आहे. तेथे परमिट रूमला अनुमती दिली, तर या परिसरात अनुचित प्रकार घडून कायदा आणि सुव्यवस्थेचा प्रश्न निर्माण होऊ शकतो. त्यामुळे ‘परमिट रूम’ला अनुमती दिल्यास नागरिक तीव्र आंदोलन करतील, असे या निवेदनात नमूद करण्यात आले आहे.