तुंग (सांगली) येथे विलंबापर्यंत मिरवणुका काढणार्‍या ३ मंडळ अध्यक्षांवर गुन्हा नोंद !
सांगली – मिरज तालुक्यातील तुंग येथे विसर्जन मिरवणुकीच्या दिलेल्या समय मर्यादेचा भंग केल्याप्रकरणी ३ गणेशोत्सव मंडळांच्या अध्यक्षांवर गुन्हा नोंद करण्यात आला आहे. याविषयी सांगली ग्रामीण पोलिसांच्या पथकाने ही कारवाई केली. मध्यरात्री १२.३० वाजेपर्यंत या मिरवणुका चालू राहिल्याने ही कारवाई करण्यात आली.
गुन्हा नोंद झालेल्यांमध्ये तुंग येथील ‘संत रोहिदास शिवप्रेमी गणेशोत्सव मंडळा’चे अध्यक्ष चिन्मय हंकारे, ‘शिवाजीनगर राजा मित्रमंडळा’चे अध्यक्ष राहुल गुरव आणि ‘शिवक्रांती मित्रमंडळा’चे अध्यक्ष वैभव कुंभोजे यांचा समावेश आहे. सार्वजनिक गणेशोत्सव मंडळांकडून वेळेत विसर्जन व्हावे, यासाठी पोलीस प्रशासनाकडून वेळेची मर्यादा देण्यात आली होती. त्यानुसारच विसर्जन करण्याच्या सूचनाही आहेत. तरीही नियमांचे उल्लंघन होत आहे.