अनंतनाग (जम्मू-काश्मीर) येथे एकूण ५ अधिकारी आणि सैनिक वीरगतीला प्राप्त

अनंतनाग (जम्मू-काश्मीर) – येथे जिहादी आतंकवाद्यांसमवेत गेल्या २ दिवसांपासून चालू असणार्‍या चकमकीमध्ये कर्नल मनप्रीत सिंह, मेजर आशिष धोनचक, पोलीस उपायुक्त हुमायू भट आणि २ सैनिक वीरगतीला प्राप्त झाले आहेत. आतापर्यंत २ आतंकवाद्यांना ठार करण्यात आले असले, तरी अद्याप येथील डोंगरांवर २-३ आतंकवादी लपले असून त्यांना ठार करण्याचा प्रयत्न सैन्याकडून केला जात आहे. लष्कर-ए-तोयबाशी निगडीत प्रतिबंधित संघटना ‘रेझिस्टन्स फ्रंट’ने या आक्रमणाचे दायित्व घेतले आहे. अधिकार्‍यांच्या मते; हे तेच आतंकवादी आहेत, ज्यांच्यासमवेत ४ ऑगस्ट या दिवशी कुलगामच्या जंगलात झालेल्या चकमकीत ३ सैनिक वीरगतीला प्राप्त झाले होते.

 (सौजन्य : News18 Rajasthan)

काश्मीरमध्ये गेल्या ३ वर्षांतील हे सर्वांत मोठे आक्रमण आहे. यापूर्वी ३० मार्च २०२० या दिवशी काश्मीरमधील हंदवाडा येथे १८ घंटे चाललेल्या चकमकीमध्ये कर्नल, मेजर आणि उपनिरीक्षकासह ५ अधिकारी वीरगतीला प्राप्त झाले होते. या वर्षी जानेवारीपासून जम्मू-काश्मीरमध्ये ४० आतंकवादी मारले गेले आहेत. त्यांपैकी केवळ ८ स्थानिक होते आणि उर्वरित सर्व परदेशी होते.