राधाकृष्‍ण विखे पाटील यांना काळे फासणार्‍यास ‘मल्‍हार सेने’कडून ५१ सहस्र रुपयांच्‍या पारितोषिकाची घोषणा !
जालना – ८ सप्‍टेंबर या दिवशी धनगर समाजाच्‍या शेखर बंगाळे नामक तरुणाने भाजपचे नेते तथा राज्‍याचे महसूलमंत्री राधाकृष्‍ण विखे पाटील यांच्‍या अंगावर भंडारा उधळून धनगर समाजाला आरक्षणाची मागणी केली होती. या वेळी सोलापूर येथील भाजपचे शहराध्‍यक्ष नरेंद्र काळे यांनी त्‍यांना अमानुष मारहाण केली होती. या संदर्भातील व्‍हिडिओ समाजात प्रसारित झाला आहे. मराठा आरक्षणाच्‍या मागणीसाठी आंदोलन तीव्र होत असतांनाच आता धनगर समाजाचे आंदोलनही तीव्र होत आहे. त्‍यातच राधाकृष्‍ण विखे पाटील यांच्‍या तोंडाला काळे फासणार्‍यास ५१ सहस्र रुपयांचे पारितोषिक ‘मल्‍हार सेने’कडून घोषित करण्‍यात आले आहे.
या घटनेमुळे धनगर समाजाच्‍या संघटना अधिक आक्रमक झाल्‍या आहेत. या संदर्भात नरेंद्र काळे यांनी जाहीर क्षमा मागितली आहे. तरीही धनगर समाजातील कार्यकर्ते अद्याप शांत झालेले नाहीत. त्‍यामुळे जालना जिल्‍ह्यातील अंबड तहसील कार्यालयासमोर ‘मल्‍हार सेने’च्‍या वतीने राधाकृष्‍ण विखे पाटील यांच्‍या विरोधात निदर्शने करण्‍यात आली. धनगर समाजाच्‍या तरुणास झालेल्‍या मारहाणीचा निषेध आंदोलकांनी केला आहे, तसेच मंत्री राधाकृष्‍ण विखे पाटील यांच्‍या त्‍यागपत्राची मागणी मल्‍हार सेनेने केली आहे.