गणेशोत्सवाच्या कालावधीत गणेशाची उपासना कशी करावी ?

१. ‘घरात श्री गणेशमूर्तीची प्रतिष्ठापना केल्याच्या दिवसापासून तिचे विसर्जन होईपर्यंतच्या दिवसापर्यंत तिची प्रतिदिन पूजा आणि आरती करावी. घरातील सर्व व्यक्तींनी आरतीच्या वेळी उपस्थित रहावे.

२. श्री गणेशाची २१ नावे म्हणत श्री गणेशाला २१ दूर्वा वहाव्यात. दूर्वा मिळाल्या नाहीत, तरी २१ नावांचा मोठ्या आवाजात उच्चार करावा.

३. प्रतिदिन सकाळी, दुपारी आणि संध्याकाळी असे ३ वेळा एखादे गणेशस्तोत्र म्हणावे.

४. प्रतिदिन देवाला दूर्वा, शमी, मंदारचे फूल किंवा तांबडे फूल वहावे.

५. आरतीची ध्वनीचकती न लावता सर्वांनी आरती म्हणावी. आरती पाठ नसल्यास पुस्तकात बघून आरती म्हणावी.

६. आरतीनंतर घरातील सर्वांनी एकत्र बसून संकटनाशन स्तोत्राचे किमान ३ पाठ करावेत.

७. श्री गणेशचतुर्थीच्या दिवशी मध्यान्ह काळी श्री गणेशासमोर बसून डोळे मिटून श्वासावर लक्ष ठेवून शरीर सैल सोडून मांडी घालून बसावे. ‘श्री गणेशा, मला आपले दर्शन व्हावे’, असे म्हणून प्रार्थना करावी आणि शांत बसावे. जे होईल, ते पहावे. निश्चित आपल्याला श्री गणेशाच्या अस्तित्वाची जाणीव होईल; कारण श्री गणेशानेच सांगितले आहे, ‘मी शुद्ध चतुर्थीला मध्यान्ह काळी स्थित आहे.’

८. श्री गणेशाच्या एखाद्या मंत्राचे अनुष्ठान करावे.

९. गोष्टीरूप श्री गणेशपुराणाचे वाचन करावे.

१०. गणेशोत्सवात गणेशाचा विचार आणि चिंतन करावे. यामुळे आपण धन्य होऊन घरातील वातावरण मंगलमय होईल. मग आनंदच आनंद !’

(साभार : वार्तापत्र, ‘मयूरेश’, सप्टेंबर २०१६)