१ जुलैपासून अमरनाथ यात्रेस आरंभ !

श्रीनगर (जम्मू-काश्मीर) – १ जुलैपासून चालू होणार्‍या अमरनाथ यात्रेची सर्व सिद्धता अंतिम टप्प्यात आहे. या वेळी यात्रा पूर्णपणे तंबाखूमुक्त असेल. जम्मू-काश्मीरच्या आरोग्य विभागाने २८ जूनला या दृष्टीने प्रसारित केलेल्या आदेशनुसार राष्ट्रीय तंबाखू नियंत्रण कार्यक्रमांतर्गत यात्रा तंबाखूमुक्त असेल. यासह ‘अमरनाथ श्राइन बोर्डा’नेही काही नियम केले आहेत. त्यानुसार यात्रेकरूंना अडीच किमीच्या अतीजोखमीच्या मार्गावर शिरस्त्राण (हेल्मेट) घालणे बंधनकारक असणार आहे. एवढेच नाही, तर खेचरावर बसून  जाणार्‍या भाविकांना शिरस्त्राण अनिवार्य असणार असेल. ‘श्राइन बोर्डा’कडून शिरस्त्राण विनामूल्य दिले जाणार आहे.

अमरनाथ यात्रा में तंबाकू बैन: लैंड स्लाइड के चलते ढाई किमी का सफर हेलमेट पहनकर करना होगा; 1 जुलाई से होगी यात्रा#AmarnathYatra #AmarnathYatra2023 https://t.co/vEi6sRWgLr pic.twitter.com/dh3nQdZrxD

— Dainik Bhaskar (@DainikBhaskar) June 29, 2023

१. यात्रेकरूंची पहिली तुकडी ३० जून या दिवशी ‘जम्मू भगवती नगर बेस कॅम्प’ येथून मार्गस्थ होईल.

२. गतवर्षी पवित्र गुहेजवळ ढगफुटी होऊन पूर आला होता. त्यामुळे या वेळी अधिक सतर्कता बाळगण्यात येत आहे.

३. २८ जूनपर्यंत ३ लाखांहून अधिक यात्रेकरूंनी अमरनाथ यात्रेसाठी नोंदणी केली होती. हा आकडा गेल्या वर्षीच्या तुलनेत १० टक्क्यांनी अधिक आहे.

४. यावर्षी रात्रीच्या वेळी कोणत्याही प्रवाशाला पवित्र गुहेजवळ थांबण्याची अनुमती दिली जाणार नाही.

५. अमरनाथ यात्रेपूर्वी जम्मू-काश्मीर प्रशासनाने बालटाल आणि चंदनवाडी येथे प्रत्येकी १०० खाटांची दोन रुग्णालये बांधली आहेत. प्रशासनाने या अत्याधुनिक रुग्णालयांसाठी १३ कोटी रुपये खर्च केले आहेत. ‘श्राइन बोर्डा’ने १ सहस्र ७०० डॉक्टर आणि कर्मचारी तैनात केले आहेत.