जगन्‍नाथ रथयात्रा सोहळा उत्‍साहात साजरा !
पुणे – पावसाची संततधार असली, तरीही अखंड जयघोष करत मोठ्या उत्‍साहात आणि भक्‍तीमय वातावरणात जगन्‍नाथ रथयात्रा सोहळा साजरा झाला. ओडिशामधील जगन्‍नाथ पुरी येथील रथयात्रेच्‍या पार्श्‍वभूमीवर आंतरराष्‍ट्रीय कृष्‍णभावनामृत संघ इस्‍कॉन, पुणे यांनी रथयात्रेचे आयोजन केले होते. असंख्‍य भाविक पारंपरिक वेशात यामध्‍ये सहभागी झाले होते. सर परशुरामभाऊ महाविद्यालय येथून निघालेली यात्रा लक्ष्मी रस्‍ता – बालगंधर्व रंगमंदिर – जंगली महाराज रस्‍ता – टिळक चौक मार्गे येऊन सप महाविद्यालयात यात्रेचा समारोप झाला. अनेक संन्‍यासी आणि महापुरुष यामध्‍ये सहभागी झाले होते. या वेळी पालकमंत्री चंद्रकांत पाटील, काँग्रेसचे आमदार रवींद्र धंगेकर, राजेश पांडे, श्रीनाथ भिमाले, इस्‍कॉनचे वरिष्‍ठ संन्‍यासी, इस्‍कॉन मंदिराचे उपाध्‍यक्ष, रथयात्रेचे मार्गदर्शक आणि समन्‍वयक आदी सहभागी झाले होते. रथयात्रेदरम्‍यान ७० सहस्र भाविकांना महाप्रसादाच्‍या पाकिटांचे वाटप केले, तर १० सहस्र भक्‍तांना भोजन दिले.