जालना येथे ३ वर्षांत मोकाट कुत्र्यांनी ५ सहस्र ५०० जणांचे लचके तोडले !

७ सहस्र मोकाट कुत्र्यांची दहशत !

जालना – शहरातील विविध रस्त्यांवर बिनधास्तपणे वावरणारी मोकाट कुत्री वाहनचालकांच्या अंगावर येतात. ये-जा करणार्‍या नागरिकांसह शाळेत जाणार्‍या लहान मुलांच्याही पाठीमागे लागतात. शहरात मोकाट कुत्र्यांनी प्रतिदिन ६ ते ११ जणांचा चावा घेतल्याच्या घटना घडत आहेत. नगरपालिकेकडून प्रतिवर्षी निर्बिजीकरणासाठी लाखो रुपयांची तरतूद केली जाते; परंतु गेल्या काही वर्षांत निर्बिजीकरण करण्यात आलेले नाही. शहरात उघड्यावरच मटनांची दुकाने थाटल्याने मोकाट कुत्र्यांची संख्या वाढत आहे.

१. ४ लाख लोकसंख्या असलेल्या जालना शहरात ७ सहस्र मोकाट कुत्र्यांची दहशत आहे. मागील ३ वर्षांत मोकाट कुत्र्यांनी ५ सहस्र ४७५ जणांचे लचके तोडल्याची जिल्हा सामान्य रुग्णालयात नोंद झाली आहे. रुग्णालयात प्रतिदिन ४० ते ६० रुग्णांवर उपचार केले जात आहेत.

२. कुत्र्यांची ही समस्या नगरपालिकेच्या सभेत वारंवार चर्चिली गेली; परंतु प्रत्यक्षात ती सुटलेली नाही.

३. निर्बिजीकरणासाठी चालू वर्षात १० लाख रुपयांची तरतूद करण्यात आली आहे.  निर्बिजीकरणासाठी येत्या ४ मासांत स्वतंत्र निविदा काढली जाणार आहे.