अत्यंत अस्वच्छता, मोकाट जनावरे, इमारतीची दुरवस्था यांसह अनेक समस्या असलेले अक्कलकोट बसस्थानक !

महाराष्ट्रातील एक महत्त्वाचे देवस्थान असलेल्या अक्कलकोट येथील बसस्थानकाची दुरवस्था !

अक्कलकोट (जिल्हा सोलापूर) – ज्या स्वामी समर्थांच्या दर्शनासाठी केवळ महाराष्ट्र आणि कर्नाटक येथूनच नाही, तर संपूर्ण भारतभरातून भाविक येतात, त्या अक्कलकोट बसस्थानकाची स्थिती अत्यंत वाईट आहे. बसस्थानकाच्या परिसरात प्रचंड प्रमाणात अस्वच्छता असून येथे भटकी कुत्री, डुकरे अशा प्राण्यांचा अधिक वावर आढळतो.

१. बसस्थानकावरील स्वच्छतागृहाची स्थितीही अत्यंत वाईट आहे. बसस्थानकामधील छताची दुरवस्था झाली आहे.

२. कार्यालयाकडे जाणार्‍या जिन्यात ठिकठिकाणी पान, गुटखा यांच्या पिचकार्‍या दिसत असून पत्रपेटीही अत्यंत वाईट अवस्थेत आहे.

३. बसस्थानकातील भींतींचे रंग उडाले आहेत.

४. स्वच्छतागृह अस्वच्छ असल्याने, तसेच प्रवाशांना शिस्त नसल्याने ते बसस्थानकाच्या परिसरात उघड्यावरच प्रातर्विधी उरकतात.

५. येथील झाडांवरही खराब फडकी टाकलेली दिसतात.

बसस्थानकाच्या या स्थितीविषयी काही भाविकांनी अप्रसन्नता व्यक्त करत ‘राज्य परिवहन महामंडळ, तसेच स्थानिक नगरपालिका प्रशासन यांनी याकडे लक्ष दिले पाहिजे’, असे मत व्यक्त केले.