मुंबई-पुणे एक्‍सप्रेस रस्‍त्‍यावर भीषण अपघात !
१२ गाड्या एकमेकांवर धडकल्‍या
पुणे – मुंबई-पुणे एक्‍सप्रेस रस्‍त्‍यावर खोपोली ‘एक्‍झिट’जवळ २७ एप्रिल या दिवशी १२ वाहनांचा भीषण अपघात झाला आहे. १२ गाड्या एकमेकांवर जोरात आदळल्‍या असून अपघातात गाड्यांची मोठ्या प्रमाणात हानी झाली आहे, तर काही जण घायाळ झाले आहेत. सुदैवाने या भयानक अपघातात अद्याप कुठलीही जीवितहानी झाली नाही. या अपघातानंतर दृतगती महामार्गावर प्रचंड प्रमाणात वाहतूककोंडी झाली. पोलिसांनी तातडीने घटनास्‍थळी धाव घेत साहाय्‍य चालू केले आहे, तसेच स्‍थानिक नागरिकही वाहतूककोंडी दूर करण्‍यासाठी सहकार्य करत आहेत. ट्रकचालकाचा वाहनावरील ताबा सुटल्‍याने हा विचित्र अपघात घडला आहे. ट्रकने १२ वाहनांना धडक दिली; परंतु या घटनेनंतर ट्रकचालक हा घटना स्‍थळावरून पसार झाला. रायगड पोलिसांकडून या वाहनचालकाचा शोध घेण्‍यात येत आहे. २ दिवसांपूर्वी याच मार्गावर ट्रक आणि बसचा अपघात झाला होता. या अपघातात ४ जणांना जीव गमवावा लागला होता.