साधकाने सद्गुरु डॉ. मुकुल गाडगीळ यांनी सांगितलेला उपाय केल्यावर त्याला होणारा ‘स्लीप पॅरालिसिस्’चा त्रास नाहीसा होणे
‘स्लीप पॅरालिसिस्’ म्हणजे झोपलेल्या व्यक्तीला जाग येत असतांना (अर्धवट जागृतावस्थेत असतांना) तिला हालचाल करता येत नाही किंवा बोलता येत नाही. याचा कालावधी काही सेकंद किंवा काही मिनिटे एवढाच असतो.
१. ‘स्लीप पॅरालिसिस्’चा त्रास होणे आणि त्रास होऊ लागल्यावर प.पू. भक्तराज महाराज यांचा जयघोष करणे : ‘पूर्वी मला ३ – ४ मासांतून एकदा ‘स्लीप पॅरालिसस्’चा त्रास होत असे आणि त्यातून बाहेर पडल्यावर थकवा येत असे. अलीकडे १५ दिवसांत मला ५ – ६ वेळा ‘स्लीप पॅरालिसिस्’चा त्रास झाला. मला असा त्रास होऊ लागल्यावर मी प.पू. भक्तराज महाराज यांचा जयघोष करत असे. त्यानंतर २ – ३ मिनिटांनी माझा त्रास न्यून होत असे.
२. सद्गुरु डॉ. मुकुल गाडगीळ यांनी सांगितल्याप्रमाणे शेजारी एक काठी ठेवून झोपल्यावर सूक्ष्मातून दिसलेले दृश्य : ३०.१२.२०२२ या दिवशी मी सद्गुरु डॉ. मुकुल गाडगीळ यांना मला होणार्‍या ‘स्लीप पॅरालिसिस्’च्या त्रासाविषयी सांगितले. तेव्हा त्यांनी मला शेजारी एक काठी ठेवून झोपायला सांगितले. (काठी झोपणार्‍याच्या शय्येजवळ ठेवल्याने तिच्यातील तेजतत्त्वरूपी स्पंदनांच्या संपर्कामुळे त्याची उजवी नाडी कार्यरत रहाते. त्यामुळे त्याच्यातील क्षात्रतेज निजल्यावरही जागृत अवस्थेत रहाते आणि त्याचा स्थूलदेह सूक्ष्मातील वाईट शक्तींच्या आक्रमणांना प्रतिकार करण्यास सतर्क अन् संवेदनशील अवस्थेत रहातो. (संदर्भ : सनातनचा ग्रंथ ‘शांत निद्रेसाठी काय करावे ?)) त्यानुसार मी त्या रात्री शेजारी काठी ठेवून झोपलो. मला ‘स्लीप पॅरालिसिस्’चा त्रास चालू झाल्यावर मला सूक्ष्मातून दिसले, ‘एका स्त्रीमध्ये देवी प्रगट झाली आणि ती देवी मला त्रास देणार्‍या वाईट शक्तींना हाकलून लावत आहे. त्या वाईट शक्ती भयभीत होऊन बाहेर पळत आहेत.’
३. त्यानंतर मला ३ – ४ मिनिटांनी जाग आली. तेव्हा मला नेहमीच्या तुलनेत ‘स्लीप पॅरालिसिस्’चा त्रास केवळ १० टक्के जाणवला. मला शरीर दुखण्याचा त्रास झाला नाही. मला उत्साह जाणवत होता. त्यानंतर मला ‘स्लीप पॅरालिसिस्’चा त्रास झाला नाही.
मला होणारा ‘स्लीप पॅरालिसिस्’चा त्रास केवळ गुरुदेवांची कृपा आणि सद्गुरु गाडगीळकाका यांचा संकल्प यांमुळे नाहीसा झाला. त्याबद्दल मी त्यांच्या चरणी कोटीशः कृतज्ञता व्यक्त करतो.’ ॐ
– श्री. चेतन हरिहर, सनातन आश्रम, रामनाथी, गोवा (२.१.२०२३)
|