सरसंघचालकांच्या नावे प्रसारित करण्यात आलेल्या बनावट पत्रात मुसलमान मुलींना हिंदु धर्मात आणण्याचे आवाहन !

राष्ट्रीय स्वयंसेवक संघाला धर्मांध ठरवण्याचे षड्यंत्र !

मुंबई – राष्ट्रीय स्वयंसेवक संघाचे बनावट ‘लेटरहेड’ सिद्ध करून प.पू. सरसंघचालक डॉ. मोहनजी भागवत यांच्या नावे मुसलमान मुलींना हिंदु धर्मात आणण्याचे आवाहन करणारे बनावट पत्र सामाजिक माध्यमांवरून प्रसारित करण्यात आले आहे. ‘लव्ह जिहाद’मध्ये ज्या प्रमाणे हिंदु युवतींना धर्मांध मुसलमानांकडून फसवले जाते, त्याप्रमाणे राष्ट्रीय स्वयंसेवक संघाने येनकेन प्रकारेण मुसलमान युवतींना हिंदु धर्मात आणण्याचे आवाहन केले असल्याचा अपप्रचार या पत्रात करण्यात आला आहे.

Islamists share fake letter attributed to RSS, claim Hindu outfit wants to ‘entrap’ Muslim womenhttps://t.co/YMVA9C3r72

— OpIndia.com (@OpIndia_com) April 10, 2023

या पत्रामध्ये मुसलमान मुलींना आकर्षित करण्याच्या  विविध क्लृप्त्या देण्यात आल्या आहेत. मुसलमान युवतींना प्रेमाच्या जाळ्यात फसवणे, विवाहपूर्व शारीरिक संबंध प्रस्थापित करणे आणि त्यांच्याशी विवाह करणे, असे आवाहन या पत्रात करण्यात आले आहे. यामध्ये आवश्यक कायदेविषयक आणि भौतिक साहाय्य देण्याचे, तसेच विवाहानंतर ५ लाख रुपये देण्यात येतील, असे नमूद करण्यात आले आहे. हे सर्व प्रकार राष्ट्रीय स्वयंसेवक संघ आणि प.पू. सरसंघचालक डॉ. मोहनजी भागवत यांच्या नावे खपवण्यात आले आहेत. या पत्राची प्रत अखिल भारतीय हिंदु समाज, बजरंग दल, हिंदु सेना, हिंदु युवा वाहिनी आणि समस्त हिंदु समाज यांना पाठवण्यात आल्याचे नमूद करण्यात आले आहे. ‘ट्विटर’वर ‘#bhagwalovetrap’ या ‘हॅशटॅग’च्या (एकाच विषयावर चर्चा घडवून आणण्याच्या) माध्यमातून हे बनावट पत्र प्रसारित करण्यात आले आहे.