५६ टक्के आध्यात्मिक पातळीची उच्च स्वर्गलोकातून पृथ्वीवर जन्माला आलेली कणकवली येथील कु. सानिध्या स्वस्तिक सावंत (वय ९ वर्षे)

उच्च लोकातून पृथ्वीवर जन्माला आलेली दैवी (सात्त्विक) बालके म्हणजे पुढे हिंदु राष्ट्र चालवणारी पिढी ! कु. सानिध्या स्वस्तिक सावंत ही या पिढीतील एक आहे !

१. चांगली आकलनक्षमता

‘सानिध्याचे पाठांतर चांगले आहे. तिने कठीण श्लोक मुखोद्गत केले आहेत. तिची शालेय शिक्षणातील प्रगतीही चांगली आहे. तिला थोडासा अभ्यास करूनही चांगले गुण मिळतात.

२. समंजस

ती जशी मोठी होत गेली, तसा तिच्यातील समंजसपणा वाढत गेला.

३. मिळून मिसळून रहाणे

सानिध्या लहानपणासूनच इतरांमध्ये मिळून मिसळून रहाते. तिला ‘समवेत आई-वडील हवेत’, असे काही नाही. ती कुणाही नातेवाईकाकडे रहाते. तिला तिच्या नावाप्रमाणेच सगळ्यांच्या ‘सान्निध्या’त रहायला आवडते.

४. सेवेची आवड

तिला तिच्या आजीच्या समवेत वाचकांना साप्ताहिक आणि मासिक ‘सनातन प्रभात’चे अंक द्यायला आवडत असे. तिला मुंबईतील सेवाकेंद्रात जायला आवडत असे. ती तिथे बसून नामजप करत तिच्या क्षमतेनुसार सेवा करत असे. सद्गुरु अनुराधा वाडेकर सानिध्याला ओळखतात आणि त्या दोघींची भेट झाल्यावर तिच्याकडून नामजप करून घेतात.

५. रामनाथी आश्रमाप्रती भाव असणे

एकदा आम्ही रामनाथी, गोवा येथील सनातनच्या आश्रमात गेलो होतो. तिथे सानिध्याला सेवा करतांना आनंद मिळत होता. तेथील संतांचा सत्संग लाभल्यावर तिची पुष्कळ भावजागृती झाली. तिला रामनाथी आश्रमातून घरी जायची इच्छा होत नव्हती. तिला ‘आश्रमात राहून गुरुसेवा करावी’, असे वाटत होते.

६. स्वभावदोष

आपले तेच खरे करणे, आळस आणि राग.’

– सौ. सदिच्छा सावंत (कु. सानिध्याची आई), कलमठ, कणकवली, जि. सिंधुदुर्ग. (२५.५.२०२२)