ब्रिटन सरकारच्या धोरणांवर टीका करणार्‍या वृत्त निवेदकाची बीबीसीकडून उचलबांगडी !

लंडन – बीबीसीचे मुख्य क्रीडा निवेदक गॅरी लिनेकर यांनी ब्रिटन सरकारच्या प्रवासी धोरणावर टीका केल्यामुळे त्यांना निलंबित करण्यात आले. यामुळे बीबीसीचा कर्मचारी वर्ग अप्रसन्न असून त्यांनी काम करण्यास नकार दिला आहे. यामुळे बीबीसीला ११ मार्च या दिवशी प्रसारित होणारा विशेष कार्यक्रम रहित करावा लागला.

१. लिनेकर हे ब्रिटन फुटबॉल संघाचे माजी कर्णधार आहेत. बीबीसीकडून आयोजित करण्यात येणार्‍य फुटबॉलविषयक कार्यक्रमात लिनेकर हे सर्वाधिक मानधन घेणारे मुख्य निवेदक आहेत. आठवड्याच्या आरंभी त्यांनी सरकारने सादर केलेल्या ब्रिटनच्या स्थलांतर धोरणावर टीका केली होती. त्यासाठी त्यांना निलंबित करण्यात आले.

२. ब्रिटनचे पंतप्रधान ऋषी सुनक यांनी निवेदन सादर करून सरकारच्या स्थलांतरितांच्या संदर्भातील धोरणांचा बचाव केला. सुनक यांनी काही दिवसांपूर्वी संसदेत स्थलांतराविषयी विधेयक सादर करणार असल्याचे सांगितले आहे. ब्रिटनमध्ये आश्रय घेण्यासाठी अनेक शरणार्थी नौकेद्वारे जीव धोक्यात टाकून ब्रिटीश खाडी ओलांडून येतात. अवैधपणे येणार्‍या या लोकांवर सरकार निर्बंध घालण्याच्या सिद्धतेत आहे.

३. सुनक यांनी ‘लिनेकर आणि बीबीसी यांच्यातील मतभेद सोडवले जातील’, अशी आशा व्यक्त केली.