जैन समाजाची समाजाप्रती लोककल्याणकारी भावना आहे ! – एकनाथ शिंदे, मुख्यमंत्री

मुंबई, ११ मार्च (वार्ता.) – जैन समाज हा दुसर्‍यांच्या सुख दुःखात साथ देणारा समाज आहे. जैन समाजाने संकटप्रसंगी देशाला भरभरून साहाय्य केले आहे. समाजाप्रती त्यांची लोककल्याणकारी भावना सर्वांना ठाऊक आहे, असे गौरवोद्गाार मुख्यमंत्री एकनाथ शिंदे यांनी येथे काढले.

राष्ट्रसंत प.पू. श्री नयपद्मसागर सुरीश्वरजी महाराज यांना ‘आचार्य पद’ प्रदान महा-महोत्सव कार्यक्रम ११ मार्च या दिवशी मुंबई येथील महालक्ष्मी रेसकोर्स येथे झाला. त्या वेळी ते बोलत होते. या कार्यक्रमास उपमुख्यमंत्री देवेंद्र फडणवीस, मुंबई उपनगर जिल्ह्याचे पालकमंत्री मंगलप्रभात लोढा, माजी मुख्यमंत्री पृथ्वीराज चव्हाण, योगगुरु बाबा रामदेव, तसेच देश-विदेशांतील संत आणि जैन बांधव मोठ्या संख्येने उपस्थित होते.

मुख्यमंत्री शिंदे म्हणाले की, राज्यशासनाने नुकताच राज्याचा अर्थसंकल्प घोषित केला असून यात सर्व लोकांची प्रगती आणि उन्नती यांचा विचार करण्यात आला आहे. त्याचसमवेत या अर्थसंकल्पात गो-सेवा आयोगाची स्थापना करण्यात आली आहे. राष्ट्रसंत नयपद्मसागरजी आणि प्रशांतसागरजी यांना आचार्य पदवी मिळाल्याविषयी मुख्यमंत्री शिंदे यांनी महाराष्ट्र शासनाच्या वतीने त्यांचे अभिनंदन केले.