कोलगाव (सिंधुदुर्ग) येथे नवीन इमारत बांधूनही शाळा भरते जुन्याच धोकादायक इमारतीत !

श्रेयवाद बाजूला ठेवून विद्यार्थ्यांसाठी कृती करा ! – पालकांची मागणी

सावंतवाडी – तालुक्यातील कोलगाव येथील जिल्हा परिषद शाळा क्रमांक १ ची नवी इमारत बांधून १ वर्ष पूर्ण झाले आहे. असे असतांनाही जुन्या धोकादायक इमारतीमध्येच शाळा भरवली जाते. जुनी इमारत कोसळून मोठा अनर्थ घडल्यास त्याला उत्तरदायी कोण ? विद्यार्थ्यांनी आणखी किती काळ जुन्या इमारतीत बसायचे ? असे प्रश्न येथील ग्रामस्थांनी उपस्थित केले आहेत.

५९ लाख रुपये खर्च करून ५ वर्गखोल्या असलेली शाळेची नवीन इमारत बांधून मार्च २०२२ मध्ये पूर्ण झाली आहे; मात्र अद्याप ही इमारत संबंधित प्रशासनाच्या कह्यात देण्यात आली नाही. श्रेयवाद बाजूला ठेवून विद्यार्थ्यांच्या जीविताच्या दृष्टीने शाळेच्या नवीन इमारतीचे नियंत्रण मुख्याध्यापकांकडे द्यावे, अशी मागणी पालकांनी केली आहे.