१० रुपयांची नाणी स्वीकारावीत, यासाठी लातूर आणि बीड येथे जिल्हा प्रशासनाकडे निवेदन सादर !

लातूर –  भारतीय चलनात भारतीय रिझर्व्ह बँकेने लागू केलेली १० रुपयांची नाणी काही ठिकाणी स्‍वीकारण्‍यास नकार दिला जात आहे, अशा तक्रारी जिल्‍हा प्रशासनाकडे प्राप्‍त झाल्‍या आहेत. लातूर आणि बीड येथील दुकानदार, बसवाहक, किरकोळ विक्रेते, रिक्शाचालक, बँक या ठिकाणी १० रुपयांची नाणी स्वीकारली जात नाहीत. यामुळे नागरिकांची पुष्कळ गैरसोय होत असून मनस्ताप सहन करावा लागत आहे. या परिस्थितीत सुधारणा व्हावी, तसेच १० रुपयांचे नाणे वापरण्याविषयी असलेले अपसमज दूर व्हावेत, यासाठी हिंदु जनजागृती समितीने सुराज्य अभियानाच्या अंतर्गत प्रशासन आणि समाज यांना साहाय्य होण्यासाठी जिल्ह्यातील अग्रणी बँक, लातूर येथील निवासी उपजिल्हाधिकारी विजयकुमार ढगे, तसेच बीड येथील जिल्हाधिकारी कार्यालय येथे निवेदन दिले. यासमवेत रिझर्व्ह बँकेचे संबंधित प्रसिद्धीपत्रक ‘ट्विटर हँडल’वरून जागृतीसाठी प्रसिद्धही केले आहे. (१० रुपयांच्या नाण्यांच्या संदर्भात नागरिकांना इतक्या अडचणी येत असूनही जिल्हा प्रशासनाने याविषयी अद्याप कोणतीच उपाययोजना का केली नाही ? यावरून प्रशासनाची नागरिकांच्या समस्या सोडविण्याविषयीची अनास्था दिसून येते. – संपादक)

निवेदनात म्हटले आहे की, रिझर्व बँकेने यासंदर्भात जनतेमध्ये जागृती होण्यासाठी १७ जानेवारी २०१८ या दिवशी ‘१० रुपयांची नाणी पूर्णपणे कायदेशीर चलन असून नागरिकांनी ते स्वीकारायला हवे’, अशा आशयाचे प्रसिद्धीपत्रक काढलेले आहे. त्यामुळे १० रुपयांची नाणी स्‍वीकारणे बंधनकारक असून भारतीय रिझर्व्ह बँकेने दिलेल्‍या मार्गदर्शक तत्त्वांनुसार अशा प्रकारे १० रुपयांचे नाणे स्‍वीकारण्‍यास नकार देणार्‍या व्‍यक्तीविरुद्ध गुन्‍हा नोंद होऊन तो शिक्षेस पात्र ठरू शकतो.