सातारा येथील बाँबे रेस्टॉरंट चौक ते संगमनगर रस्त्यावर दोन्ही बाजूस पथदीप बसवण्याची मागणी !

सातारा, २८ नोव्हेंबर (वार्ता.) – शहर परिसरात असलेल्या बॉम्बे रेस्टॉरंट चौक ते संगमनगर रस्त्याच्या दोन्ही बाजूस पथदीप बसवण्यात यावेत, अशी मागणी स्थानिक नागरिकांतून होत आहे.

सध्या सातारा-सोलापूर महामार्गाच्या रुंदीकरणाचे काम हाती घेण्यात आले आहे; मात्र शहराजवळील बाँबे रेस्टॉरंट चौक ते संगमनगर या परिसरात अत्यंत संथ गतीने काम चालू आहे. यामुळे रस्त्यावरून प्रवास करणार्‍यांना प्रचंड धुळीचा त्रास सहन करावा लागत आहे, तसेच रस्त्याच्या कडेला असणारे दुकानदार आणि रहिवासी यांनाही धुळीचा प्रचंड त्रास होऊन आरोग्यविषयीच्या समस्या निर्माण होऊ लागल्या आहेत. गेल्या काही दिवसांपासून हे काम पूर्णत: बंद झाले आहे. या रस्त्यावर दोन्ही बाजूस पथदीप नसल्यामुळे रात्री कोणताही अनर्थ घडू शकतो. यापूर्वी अंधारात अनेकवेळा लुटालुटीचे प्रकार घडले आहेत, तसेच अनेकवेळा माता-भगिनी-नागरिक यांना जीव मुठीत धरून रस्त्यावरून ये-जा करावी लागते. रस्त्यावरून वाहनेही भरधान वेगाने ये-जा करत असतात. त्यामुळे अपघात होण्याची शक्यताही वाढली आहे.