मुंबई महानगरपालिकेच्या नायर, शीव, ‘के.ई.एम्.’ आदी रुग्णालयांत मांजरांच्या वावरामुळे रुग्ण त्रस्त !

नायर रुग्णालयातील कर्मचार्‍यांचे रुग्णांना उर्मट उत्तर (म्हणे) ‘ते (प्राणी) आमचे नातेवाईक असल्याने आम्ही त्यांना बाहेर जाण्यास सांगत नाही !’

नायर रुग्णालयात उपचार घेणारे सुभाष दिघे म्हणाले, ‘‘मी उपचार घेत असलेल्या कक्षात अन्य रुग्णांचे नातेवाईक आल्यास कर्मचारी त्यांना तेथून बाहेर जाण्यास सांगत होते; मात्र तेथेे फिरणार्‍या प्राण्यांविषयी कर्मचार्‍यांकडे विचारणा केली असता, ‘ते (प्राणी) आमचे नातेवाईक आहेत’, असे कर्मचारी रुग्णांना सांगायचे.’’ (अशांच्या घरी या भटक्या प्राण्यांना सोडण्याची मागणी कुणी केल्यास चुकीचे काय ? रुग्णांना अशी असंवेदनशील उत्तरे देणार्‍या कर्मचार्‍यांना सरकारने घरचा रस्ता दाखवला पाहिजे ! – संपादक)

प्राण्यांच्या उच्छादाच्या समस्येवर सूचनाफलकाचा उतारा !

परळ येथील ‘के.ई.एम्.’ रुग्णालयातही मांजरांचा वावर मोठ्या प्रमाणात असल्यामुळे रुग्णालयाच्या भिंतीवर ठिकठिकाणी ‘रुग्णालयाच्या आवारात कुत्रे आणि मांजरी यांना खाऊ घालण्यास सक्त मनाई आहे’, ‘कुत्रे आणि मांजर यांचा वावर अतीदक्षता विभाग, ऑपरेशन विभाग, तसेच रुग्णालयाच्या विविध विभागांत वाढत आहे. तो थांबवणे आपल्या सर्वांचे दायित्व आहे’, आदी सूचना लावण्यात आल्या आहेत. (‘भिंतींवर सूचना लिहिल्या, म्हणजे स्वतःचे दायित्व संपले’, असे प्रशासनाने समजू नये ! प्राण्यांना रुग्णालयात अटकाव करण्यासाठी रुग्णालय प्रशासनानेच कृतीच्या स्तरावर प्रयत्न करायला हवेत ! – संपादक)

संपादकीय भूमिका

• रुग्णांच्या आरोग्याशी खेळणार्‍या प्रशासनातील उत्तरदायींना सरकारने तात्काळ बडतर्फ केले पाहिजे !
•  के.ई.एम्.रुग्णालय प्रशासनाचा ‘रोगापेक्षा ईलाज भयंकर !’