बेंगळुरूनंतर आता भाग्यनगरमध्येही भारतद्वेष्टा कलाकार वीर दास याचा कार्यक्रम रहित !

हिंदुत्वनिष्ठ संघटनांच्या संघटित विरोधाचा परिणाम !

भाग्यनगर (तेलंगाणा) – भारतद्वेषी आणि हिंदुद्वेष्टा विनोदी कलाकार वीर दास याचा भाग्यनगरमध्ये २० नोव्हेंबर या दिवशी होणारा कार्यक्रम हिंदुत्वनिष्ठ संघटनांच्या विरोधामुळे रहित करण्यात आला. येथील शिल्पाकला वेदिका येथे हा कार्यक्रम आयोजित करण्यात आला होता; परंतु हिंदु जनजागृती समितीसमवेत अन्य हिंदुत्वनिष्ठ संघटनांच्या संघटित विरोधामुळे हा कार्यक्रम रहित करण्यात आला, अशी माहिती स्थानिक इंग्रजी वृत्तपत्र ‘द हंस इंडिया’ने दिली.

याआधी वीर दास याचा बेंगळुरू येथे १० नोव्हेंबर या दिवशी आयोजित कार्यक्रमही रहित करण्यात आला होता. या कार्यक्रमाच्या विरोधात विविध हिंदुत्वनिष्ठ संघटनांच्या साहाय्याने हिंदु जनजागृती समितीने पोलीस ठाण्यात तक्रार प्रविष्ट केली होती.