डोंबिवली येथे महानगरपालिकेच्या निष्क्रीय कारभाराच्या विरोधात नागरिकांचे आंदोलन !

ठाणे, २१ ऑक्टोबर (वार्ता.) – ‘उठ, डोंबिवली जागी हो, हक्कासाठी सिद्ध हो’, अशा घोषणा देत डोंबिवली येथील नागरिकांनी २० ऑक्टोबरच्या रात्री फडके रस्त्यावरील आप्पा दातार चौक येथे कल्याण-डोंबिवली महानगरपालिकेच्या निष्क्रीय कारभाराच्या विरोधात आंदोलन केले. येथील आंदोलनात विविध भागांतील नागरिक सहभागी झाले होते. काही नागरिकांनी आंदोलनात सहभागी न होता घरातील आणि व्यापार्‍यांनी दुकानातील विजेचे दिवे रात्री ८ ते ८.०५ या वेळेत बंद करून निषेध नोंदवला. या आंदोलनात २०० हून अधिक नागरिक सहभागी झाले होते. शहरातील दुरवस्था झालेले रस्ते, खड्डे, वाहतूककोंडी आणि इतर नागरी समस्यांनी येथील नागरिक त्रस्त झाले आहेत.