गोवा येथील शेतात खोदलेल्या विहिरीच्या पाण्याची साधक आणि कामगार यांना जाणवलेली वैशिष्ट्ये !
१. विहीर खोदण्याचे नियोजन करणे आणि आरंभी जलतज्ञांना दाखवून ठिकाण निश्चित करणे
‘गोवा येथील एका शेतात जलतज्ञांनी विहीर खोदण्याची जागा दाखवून सांगितले, ‘‘येथे ५ मीटर खोल खोदल्यावर भरपूर पाणी मिळेल.’’ खोदकाम चालू केल्यावर त्याच दिवशी २ मीटर १० इंचावर विहिरीला पाणी लागले. दुसर्‍या दिवशी पाणी बाहेर काढण्यासाठी १० ‘हॉर्सपॉवर’चा (हॉर्सपॉवर म्हणजे अश्वशक्ती, इंजिनाची शक्ती मोजण्याचे परिमाण) पंप सतत चालू ठेवून विहीर ५ मीटर खोल खोदली. विहिरीतील पाणी निळ्या रंगाचे आणि पुष्कळ चैतन्यमय दिसत होते; म्हणून मी पाणी पिऊन पाहिले, तर ते स्वच्छ, शुद्ध आणि चवदार लागले. त्या वेळी मला जलदेवतेचे अस्तित्व जाणवले.’ – श्री. अमोल कुळवमोडे, उंचगाव, कोल्हापूर. (५.४.२०२१)
२. विहिरीच्या पाण्याची वैशिष्ट्ये
अ. ठेकेदार श्री. रामचंद्र गावकर म्हणाले, ‘‘मी गेली २० वर्षे विहिरी खोदण्याचे काम करतो; पण मी असे स्वच्छ आणि भरपूर पाणी कधी पाहिले नाही. ही देवाचीच लीला आहे.’’
आ. विहीर खोदणारे ४ कामगार विहिरीचेच पाणी पिण्यासाठी वापरतात. ते म्हणाले, ‘‘पाणी चांगले आणि न बाधणारे आहे’, याचा आम्ही अनुभव घेतला.’’
इ. ‘विहिरीतील पाणी स्वच्छ आणि शुभ्र असून ‘ती अगदी गंगाच आहे’, असे मला वाटले. त्या पाण्याची चव अप्रतिम आहे.’
– श्री. घनश्याम गावडे (आध्यात्मिक पातळी ६५ टक्के), सनातन आश्रम, रामनाथी, गोवा. (५.४.२०२१)
| येथे प्रसिद्ध करण्यात आलेल्या अनुभूती या ‘भाव तेथे देव’ या उक्तीनुसार साधकांच्या वैयक्तिक अनुभूती आहेत. त्या सरसकट सर्वांनाच येतील असे नाही. – संपादक |