छत्तीसगडमधील घुमका गावाने केली दारुबंदीची घोषणा !

रायपूर (छत्तीसगड) – छत्तीसगड राज्यातील बालोद जिल्ह्यातील घुमका गावामध्ये गावकर्‍यांनी दारुबंदी घोषित केली आहे. गावात कुणी दारूची विक्री केली, तर त्याला ५१ सहस्र रुपयांचा दंड भरावा लागणार असल्याचा नियम बनवला आहे. दारुविक्रीकडे लक्ष ठेवण्यासाठी ३ सहस्र लोकसंख्या असणार्‍या या गावात सीसीटीव्ही कॅमेरे बसवण्यात येणार आहेत. दारू प्यायलामुळे होणारे गुन्हे रोखण्यासाठी गावकर्‍यांनी हा निर्णय घेतला आहे. सरपंच मिलाप सिंह ठाकूर यांनी सांगितले की, घुमका गावातील प्रत्येक घरातील एक जण व्यसनी होता. त्यामुळे महिला आणि मुले यांना त्रास सहन करावा लागत होता. महिलांनी या संदर्भात केलेल्या विनंतीवरून गावात दारूबंदी करण्याचा निर्णय घेण्यात आला.