आसाममध्ये जिहादी यंत्रणा कार्यान्वित असलेले ७०० मदरसे बंद !

खासगी मदरशांवर नियंत्रणासाठी लवकरच कायदा !

गौहत्ती (आसाम) – आसाममधील मदरशांत जिहादी यंत्रणा कार्यान्वित असल्याची माहिती मिळाल्यानंतर राज्यशासनाने असे तब्बल ७०० मदरसे बंद केले. आतंकवादी यंत्रणा नेस्तनाबूत करण्यासाठी आणि मुलांना त्यापासून वाचवण्यासाठी आसाममधील भाजप शासनाने खासगी मदरशांवर नियंत्रण ठेवणारा कायदा आणण्याची सिद्धताही चालू केली आहे. मुख्यमंत्री हिमंत बिस्वा सरमा यांच्या म्हणण्यानुसार आतंकवादी संघटना अल्-कायदा आसाममध्ये हिंसाचार घडवण्याचा कट रचत आहे.

१. मदरशांवरील नियंत्रणासंबंधी कायदा आणण्यासाठी राज्यशासन कायदेतज्ञांचा सल्ला घेत आहे. ‘अल्पसंख्यांक समुदायातील तरुण पिढीकडे आतंकवादी संघटनांचे लक्ष आहे. तरुणांची दिशाभूल करण्यासाठी जिहादी साहित्य बंगाली भाषेत भाषांतरित करून ते  भ्रमणभाषच्या माध्यमातून त्यांच्यापर्यंत पोचवले जात आहे’, अशी माहिती गुप्तचर यंत्रणा आणि अटक करण्यात आलेल्या धर्मांध मुसलमानांच्या चौकशीतून समोर आली आहे.

२. अटक करण्यात आलेल्या जिहाद्यांपैकी अनेकांनी ‘इमाम’ (मशिदीमध्ये प्रार्थना करून घेणारा प्रमुख) म्हणून काम केले होते. आतंकवादी कारवाया करण्यासाठी ते अनेक ठिकाणी धार्मिक मेळेही आयोजित करतात. अशा मदरशांना बेकायदा निधी मिळत असल्याचीही माहिती आहे.