पक्षाच्या घटनेत हिंदुत्वाचा उल्लेख नसल्यावरून काँग्रेसचे सरचिटणीस सचिन सावंत यांनी भाजप आणि शिवसेना यांना हिणवले !

मुंबई, ७ जुलै (वार्ता.) – ‘म्हणे हिंदुत्वनिष्ठ सरकार स्थापन केले. पक्षाची घटना पहाण्याची तसदी घ्याल का ?’ असे ट्वीट करून पक्षाच्या घटनेत हिंदुत्वाचा उल्लेख नसल्यावरून काँग्रेसचे सरचिटणीस आणि प्रवक्ते सचिन सावंत यांनी भाजप अन् शिवसेना यांना हिणवले. एकनाथ शिंदे यांनी मुख्यमंत्रीपदाची शपथ घेतल्यानंतर विधानसभेत, तसेच प्रसिद्धीमाध्यमांपुढे आमचे सरकार हिंदुत्वाच्या विचाराने चालणार असल्याचे आवर्जून नमूद केले आहे. यावरून सचिन सावंत यांनी भाजप आणि शिवसेना यांना हिणवले आहे.

आणि ते म्हणतात की एकनाथ शिंदे जी व देवेंद्र फडणवीस जी यांचे हे ED सरकार हिंदुत्वासाठी स्थापन केले आहे…
केंद्रीय निवडणूक आयोगाला सादर केलेल्या त्यांच्या स्वत:च्या पक्षांची घटना पाहण्याची ते तसदी घेतील का? pic.twitter.com/TL8cg9hHYk

— Sachin Sawant सचिन सावंत (@sachin_inc) July 7, 2022

या ट्वीटमध्ये सचिन सावंत यांनी भाजप आणि शिवसेना या पक्षांच्या घटनेतील कागदपत्रेही ‘रि ट्वीट’ केली आहेत. यामध्ये भाजप पक्षाच्या घटनेत ‘मी धर्मनिरपेक्ष राज्य आणि कोणत्याही धर्मावर आधारित नसणारे राष्ट्र या संकल्पनांचा स्वीकार करतो’, असा उल्लेख आहे. यावरून सचिन सावंत यांनी भाजप हा अत्यंत दांभिक आणि दुतोंडी पक्ष आहे. यांच्या पक्ष घटनेत ‘हिंदुत्व’ हा शब्दही नाही. आधी त्यांनी पक्षघटना पालटून दाखवावी, असे म्हटले आहे. शिवसेना पक्षाच्या घटनेत ‘पक्ष राष्ट्रीय धर्मनिरपेक्षता, समाजवाद आणि राष्ट्रीय एकात्मता या तत्त्वांना बांधील असेल’, असे नमूद केले आहे.