आध्यात्मिक त्रास होत असतांना श्रीकृष्णाचा धावा केल्यामुळे त्रास उणावून कृतज्ञतेचे महत्त्व लक्षात येणे आणि सकारात्मक रहाता येणे
एकदा झोपतांना मला अकस्मात् भीती वाटू लागली. त्या वेळी ‘भीती घालवण्यासाठी काय करू ?’, असे मी श्रीकृष्णाला विचारले. तेव्हा तो म्हणाला, ‘मी तुझ्या बाजूलाच आहे’, अशी कल्पना कर.’ मी त्याने सांगितल्याप्रमाणे केल्यावर मला ‘माझा हात कुणीतरी हातात घेतला आहे, तसेच माझ्याभोवती एक कवच निर्माण झाले असून मी एका ऊबदार कोषात आहे’, असे जाणवले. थोडा वेळ मला बरे वाटले; परंतु डोळे मिटताक्षणीच मला पुष्कळ त्रासदायक तोंडवळे दिसून भीती वाटू लागली. मी पुन्हा एकदा श्रीकृष्णाचा धावा केला. तेव्हा तो म्हणाला, ‘घाबरून जाण्याऐवजी या नकारात्मक शक्तींविषयी कृतज्ञता बाळग; कारण त्यांच्यामुळेच तू एवढ्या तळमळीने माझा धावा करत आहेस.’ श्रीकृष्णाने सांगितल्याप्रमाणे केल्यावर मला शांत वाटले, तसेच माझ्या मनातील भीती नष्ट होऊन माझ्या डोळ्यांसमोर तोंडवळे दिसणे बंद झाले; पण नंतर माझी चिडचिड होऊ लागली. ‘हे सारे मला होणार्‍या आध्यात्मिक त्रासामुळे होत आहे’, याची मला जाणीव झाली, त्या वेळी श्रीकृष्ण म्हणाला, ‘वाईट शक्तींचे उद्दिष्ट ‘अस्थिर मनःस्थिती निर्माण करणे’, हे होते. तू माझी आठवण काढलीस आणि कृतज्ञताभावात राहिलीस; म्हणून वाईट शक्तींचे ते उद्दिष्ट पूर्ण झाले नाही. हेच तर मनाच्या स्थिर आणि सकारात्मक स्थितीचे महत्त्व आहे. ही सकारात्मकताच तुम्हाला संकटाचा सामना करण्याचे बळ देते.
– कु. मधुरा उदय देशपांडे, एशिया पॅसिफिक (९.२.२०२२)
|