महर्षि अध्यात्म विश्वविद्यालयाच्या वतीने तबलावादनाविषयी करण्यात आलेल्या संशोधनात्मक प्रयोगाची क्षणचित्रे !
कलेविषयी अद्वितीय संशोधन करणारे महर्षि अध्यात्म विश्वविद्यालय
डोंबिवली (ठाणे) येथील तबलावादक श्री. योगेश सोवनी (संगीत अलंकार (तबला)) आणि महर्षि अध्यात्म विश्वविद्यालयाचे श्री. गिरिजय प्रभुदेसाई (संगीत विशारद (तबला)) यांनी तबल्यावर झपतालातील ‘पेशकार’ (टीप १) हा प्रकार सादर केल्यावर जाणवलेली सूत्रे
टीप १ – तबलावादनातील बहुतेक सर्व बोलांच्या साहाय्याने विविध लयी आणि वजने (ठराविक लयीमध्ये केलेले आघात) यांच्या आधारे वादकाच्या प्रतिभेतून फुलत जाणारा तालबद्ध अन् तबलावादनात प्रारंभी वाजवला जाणारा प्रकार म्हणजे पेशकार.
२४.३.२०२२ या दिवशी ‘डोंबिवली (ठाणे) येथील तबलावादक श्री. योगेश सोवनी (संगीत अलंकार (तबला)) आणि महर्षि अध्यात्म विश्वविद्यालयाचे श्री. गिरिजय प्रभुदेसाई (संगीत विशारद (तबला)) यांनी केलेल्या तबलावादनाचा संत, साधक अन् वनस्पती यांवर काय परिणाम होतो ?’, हे अभ्यासण्यासाठी महर्षि अध्यात्म विश्वविद्यालयाच्या वतीने रामनाथी (गोवा) येथील सनातनच्या आश्रमात संशोधनात्मक प्रयोग करण्यात आला. या प्रयोगाच्या वेळी तुळस, गुलाब आणि कॅकटस (निवडुंगाचा एक प्रकार), या ३ वनस्पती ठेवण्यात आल्या होत्या. या प्रयोगामध्ये काळी दोन स्वरपट्टीतील तबल्याचा (ढाला तबल्याचा) उपयोग करण्यात आला.
१. वनस्पतींच्या संदर्भात ‘युनिव्हर्सल ऑरा स्कॅनर (यू.ए.एस्.)’ या उपकरणाद्वारे केलेल्या परीक्षणाचा निष्कर्ष
तुळशीतील नकारात्मक ऊर्जा नाहीशी होऊन तिच्यातील सकारात्मक ऊर्जा ७ पटींनी वाढली. निवडुंग आणि गुलाब या वनस्पतींच्या रोपांतील नकारात्मक ऊर्जा ७५ टक्के न्यून झाली अन् त्यांमध्ये अनुक्रमे २ आणि ७ पट सकारात्मक ऊर्जा निर्माण झाली.
वाचकांना सूचना : ‘यू.ए.एस्.’ उपकरणाची ओळख’
या लेखातील ‘यू.ए.एस्.’ उपकरणाची ओळख’, ‘उपकरणाद्वारे करावयाच्या चाचणीतील घटक आणि त्यांचे विवरण’, ‘घटकाची प्रभावळ मोजणे’, ‘परीक्षणाची पद्धत’ आणि ‘चाचणीमध्ये सारखेपणा येण्यासाठी घेतलेली दक्षता’ ही नेहमीची सूत्रे सनातन संस्थेच्या goo.gl/tBjGXa या लिंकवर दिली आहेत. या लिंकमधील काही अक्षरे कॅपिटल (Capital) आहेत.
२. आध्यात्मिक त्रास असलेल्या साधकांवर झालेला परिणाम
२ अ. साधकांना जाणवलेली सूत्रे
१. तबलावादन चालू केल्यावर त्रास असणार्‍या साधकांना अस्वस्थ वाटू लागले. वादनाचा आनंद अनुभवून स्थिर रहाण्यास त्यांना त्रास होत होता. साधकांना त्रास देणार्‍या वाईट शक्तींची शक्ती न्यून झाल्याने त्यांना प्रयोगाचा कंटाळा आला.
२. ‘पेशकार’ या प्रकारात तबलावादनाच्या विलंबित लयीच्या तुलनेत द्रुत (जलद) लयीतील तबलावादनामध्ये मारक तत्त्व अधिक असल्याने त्रास असलेल्या साधकांना अधिक त्रास झाला.
३. एका साधिकेला वादन ऐकतांना ‘संपूर्ण देहाला सूक्ष्मातून दणके बसत आहेत’, असे जाणवून अस्वस्थ वाटत होते. त्यामुळे पूर्ण प्रयोगात ती अस्वस्थच होती.
२ आ. ‘युनिव्हर्सल ऑरा स्कॅनर (यू.ए.एस्.)’ या उपकरणाद्वारे केलेल्या परीक्षणाचा निष्कर्ष : त्रास असलेल्या साधकांतील नकारात्मक ऊर्जा ५० ते ७५ टक्के न्यून झाली आणि सकारात्मक ऊर्जा तिपटीने वाढली.
३. आध्यात्मिक त्रास नसलेले साधक आणि संत यांच्यावर झालेला परिणाम
३ अ. संत आणि साधक यांना आलेल्या अनुभूती
१. श्री. सोवनी यांचे वादन भावाच्या स्तरावर झाल्याचे सद्गुरु डॉ. मुकुल गाडगीळ यांना जाणवले.
२. तबलावादन चालू असतांना कु. अपाला औंधकर (वय १५ वर्षे, नृत्य अभ्यासिका, आध्यात्मिक पातळी ६१ टक्के) आणि कु. म्रिण्मयी केळशीकर (नाट्य अभ्यासिका) यांच्यासह अन्य ५ जणांना ‘श्री. सोवनी यांना शिवाचा आशीर्वाद आहे’, असे जाणवून भगवान शिवाचे दर्शन झाले.
३. आधुनिक पशूवैद्य अजय जोशी (वय ६६ वर्षे, आध्यात्मिक पातळी ६८ टक्के) आणि कु. अपाला औंधकर यांना तबलावादन चालू झाल्यावर सुगंध येऊन तोंडात गोड चव जाणवली.
४. कु. म्रिणालिनी देवघरे (भरतनाट्यम् विशारद) आणि कु. तीर्था देवघरे (वय १७ वर्षे, भरतनाट्यम् विशारद) यांच्यासह अन्य २ साधकांना आज्ञाचक्र अन् सहस्रारचक्र यांवर चांगल्या संवेदना जाणवून पिवळसर पांढरा प्रकाश दिसला.
३ आ. ‘युनिव्हर्सल ऑरा स्कॅनर (यू.ए.एस्.)’ या उपकरणाद्वारे केलेल्या परीक्षणाचा निष्कर्ष : त्रास नसलेल्या साधकांतील नकारात्मक ऊर्जा ५० ते ७० टक्के न्यून झाली आणि सकारात्मक ऊर्जा दुपटीने वाढली.
४. दोन्ही तबलावादक (श्री. योगेश सोवनी आणि श्री. गिरिजय प्रभुदेसाई) अन् त्यांची वाद्ये (तबले) यांच्यावर झालेला परिणाम
दोन्ही तबलावादकांमधील नकारात्मक ऊर्जा ५० ते ७० टक्के न्यून झाली आणि त्यांच्यातील सकारात्मक ऊर्जा तिपटीहून अधिक वाढली. त्यांच्या वाद्यांतील नकारात्मक ऊर्जा ५० ते ७० टक्के न्यून झाली आणि सकारात्मक ऊर्जा ५ ते ६ पटींनी वाढली.
५. निष्कर्ष
या प्रयोगात ‘ढाला तबला’ वाजवण्यात आला. या तबल्याचे वैशिष्ट्य म्हणजे या तबल्याचा नाद खर्जाकडे (टीप २) जाणारा असल्याने तो (नाद) मृदंगासमान जाणवला. त्यामुळे या नादातून अधिक प्रमाणात सकारात्मक ऊर्जा निर्माण झाल्याने त्रास असलेल्या साधकांना मोठ्या प्रमाणात चैतन्य मिळून त्यांची सकारात्मक ऊर्जा वाढल्याचे माझ्या लक्षात आले, तसेच त्रास नसलेले साधक, वनस्पती, तबला इत्यादींवरही या नादाचा अधिक सकारात्मक परिणाम झाल्याचेच या प्रयोगातून लक्षात आले.
टीप २ – खालच्या पट्टीतील आवाज
– सुश्री (कुमारी) तेजल पात्रीकर (आध्यात्मिक पातळी ६३ टक्के), संगीत विशारद, संगीत समन्वयक, महर्षि अध्यात्म विश्वविद्यालय, गोवा. (२५.३.२०२२)
| • वाईट शक्ती : वातावरणात चांगल्या आणि वाईट शक्ती कार्यरत असतात. चांगल्या शक्ती चांगल्या कार्यासाठी मानवाला साहाय्य करतात, तर वाईट शक्ती त्याला त्रास देतात. पूर्वीच्या काळी ऋषिमुनींच्या यज्ञांत राक्षसांनी विघ्ने आणल्याच्या अनेक कथा वेद-पुराणांत आहेत. ‘अथर्ववेदात अनेक ठिकाणी वाईट शक्ती, उदा. असुर, राक्षस, पिशाच तसेच करणी, भानामती यांचा प्रतिबंध करण्यासाठी मंत्र दिले आहेत. वाईट शक्तींच्या त्रासांच्या निवारणार्थ विविध आध्यात्मिक उपाय वेदादी धर्मग्रंथांत सांगितले आहेत. • आध्यात्मिक त्रास : याचा अर्थ व्यक्तीमध्ये नकारात्मक स्पंदने असणे. व्यक्तीमध्ये नकारात्मक स्पंदने ५० टक्के किंवा त्यांहून अधिक प्रमाणात असणे, म्हणजे तीव्र त्रास, नकारात्मक स्पंदने ३० ते ४९ टक्के असणे, म्हणजे मध्यम त्रास, तर ३० टक्क्यांहून अल्प असणे, म्हणजे मंद आध्यात्मिक त्रास असणे होय. आध्यात्मिक त्रास हा प्रारब्ध, पूर्वजांचे त्रास आदी आध्यात्मिक स्तरावरील कारणांमुळे होतो. आध्यात्मिक त्रासाचे निदान संत किंवा सूक्ष्म स्पंदने जाणू शकणारे साधक करू शकतात. • सूक्ष्म : व्यक्तीचे स्थूल म्हणजे प्रत्यक्ष दिसणारे अवयव नाक, कान, डोळे, जीभ आणि त्वचा ही पंचज्ञानेंद्रिये आहेत. ही पंचज्ञानेंद्रिये, मन आणि बुद्धी यांच्या पलीकडील म्हणजे ‘सूक्ष्म’. साधनेत प्रगती केेलेल्या काही व्यक्तींना या ‘सूक्ष्म’ संवेदना जाणवतात. या ‘सूक्ष्मा’च्या ज्ञानाविषयी विविध धर्मग्रंथांत उल्लेख आहेत. • येथे प्रसिद्ध करण्यात आलेल्या अनुभूती या ‘भाव तेथे देव’ या उक्तीनुसार साधकांच्या आणि संतांच्या वैयक्तिक अनुभूती आहेत. त्या सरसकट सर्वांनाच येतील असे नाही. – संपादक |