पुण्यात सनबर्न होळीच्या पार्टीत तरुण-तरुणींचे मद्यप्राशन करून बेधुंद नृत्य !

हडपसर (जिल्हा पुणे)- होळी आणि धूलिवंदन यांच्या निमित्ताने हडपसर परिसरातील ‘अमनोरा’ मॉलमध्ये खासगी इव्हेंट आस्थापनाकडून ‘सनबर्न होळी महोत्सव’ या नावाखाली सनबर्न होळी पार्टीचे आयोजन करण्यात आले होते. मोठ्या प्रमाणात विज्ञापन करून या कार्यक्रमाची साडेतीन सहस्र रुपयांपर्यंत तिकीट विक्री करण्यात आली होती. उच्चभ्रू तरुण-तरुणी या कार्यक्रमात सहभागी झाले होते. यासाठी उच्च क्षमतेची ध्वनीवर्धक यंत्रणा वापरण्यात आली होती. या पार्टीत मद्यप्राशन करून बेधुंद नृत्य करणार्‍या तरुणांकडील भ्रमणभाष मोठ्या प्रमाणात चोरले गेल्याचे समोर आले आहे.

या प्रकरणी आतापर्यंत २१ तक्रारी प्रविष्ट झाल्या आहेत. मात्र भ्रमणभाष चोरीचा आकडा ८० ते ९० च्या घरात असण्याची शक्यता आहे. एका संशयितालाही पोलिसांनी कह्यात घेतले आहे. या प्रकरणी चोरांवर गुन्हा नोंद करण्यात येणार असल्याची माहिती हडपसर पोलिसांनी दिली.