जळगाव जिल्हा रुग्णालयासाठीची व्हेंटिलेटर खरेदी प्रक्रिया रहित करण्याचे आदेश ! – राजेश टोपे, आरोग्यमंत्री

जळगाव, ५ मार्च (वार्ता.) – जिल्हा रुग्णालयातील व्हेंटिलेटर खरेदी प्रकरणी चौकशी समितीकडून चौकशी करण्यात आली असून पुरवठादाराकडून पुरवण्यात आलेल्या साहित्यामध्ये (दर्जाच्या दृष्टीने) अनियमितता झाली असल्याने खरेदीचे कंत्राट रहित करण्यात आले आहे, अशी माहिती आरोग्यमंत्री राजेश टोपे यांनी विधान परिषदेत दिली. जिल्हा रुग्णालयासाठी ३० व्हेंटिलेटर्सच्या खरेदीत अपव्यवहार झाल्याविषयी तारांकीत प्रश्न ४ मार्च या दिवशी विधानपरिषदेच्या पटलावर चर्चेला ठेवण्यात आला होता. त्यावर टोपे यांनी लेखी उत्तर दिले आहे.

या व्हेंटिलेटर्सची किंमत अनुमाने पावणेदोन कोटींहून अधिक असून त्याविषयी माहिती अधिकार कार्यकर्ते दिनेश भोळे यांनी माहिती मागवली होती. त्यात मागवलेले व्हेंटिलेटर्स आणि प्रत्यक्षात पुरवण्यात आलेले व्हेंटिलेटर्स यात दर्जाच्या दृष्टीने मोठी तफावत असल्याचे आढळून आल्याने भोळे यांनी जिल्हाधिकारी अभिजित राऊत यांच्याकडे चौकशीची मागणी केली होती. जिल्हाधिकारी अभिजित राऊत यांनी ६ सदस्यीय चौकशी समिती स्थापन करून चौकशीअंती संपूर्ण खरेदी प्रक्रिया रहित करण्याचे लेखी आदेश जिल्हा रुग्णालय प्रशासनाला दिले होते.

या प्रकरणी ‘जिल्हाधिकार्‍यांनी केवळ खरेदी प्रक्रिया रहित करण्याचे आदेश देणे पुरेसे नसून दोषींवर कारवाई करावी अन्यथा उच्च न्यायालयात दाद मागू’, असे तक्रारदार भोळे यांचे म्हणणे होते.