होमिओपॅथी वैद्या (सुश्री (कु.)) आरती तिवारी यांना दैवी कणांच्या संदर्भात आलेल्या अनुभूती

१. निवासाच्या ठिकाणी वाईट शक्तींचे त्रास होणे आणि त्या कालावधीत सातत्याने दैवी कणांची अनुभूती येणे

‘वर्ष २०१७ पासून मी ज्या ठिकाणी निवासाला होते, त्या ठिकाणी ‘वाईट शक्ती सूक्ष्मातून दिसणे, झोप न येणे, झोप लागलीच तर मधूनच जाग येणे, वाईट शक्तींचा स्पर्श जाणवणे, आवाज येणे’, असे त्रास होत होते. वर्ष २०१९ मध्ये माझी निवासाची खोली पालटल्यावर तेथेही वरील प्रकारेच त्रास होत होते. या दरम्यान विविध आध्यात्मिक स्तरांवरील उपायही चालू होते. तेव्हापासून आजपर्यंत सातत्याने दैवी कणांची अनुभूती येत आहे.

२. रात्री दैवी कणांचा वर्षाव होणे आणि ‘ज्याप्रमाणे वाईट शक्ती ज्या वेगाने त्रास देतात, त्याच वेगाने भगवंत दैवी कणांचा वर्षाव करून साधकांचे रक्षण करतो’, याची तीव्रतेने जाणीव होऊन कृतज्ञता व्यक्त होणे

या कालावधीत रात्री दैवी कणांचा वर्षाव होत होता. खोली झाडल्यावर सुपलीत कचरा उचलतांना हे लक्षात आले. आरंभी आम्हाला वाटले, ‘कपड्यांची चमकी किंवा अन्य काही कारणाने असेल; परंतु नंतर असे काही कारण नसतांनाही दैवी कण आम्हाला दिसत होते. त्याविषयी  सूक्ष्मातील कळणार्‍या साधकांना ‘ते दैवी कण आहेत’, याविषयी पुष्टी मिळाली. निवास पालटल्यावरही ही अनुभूती सातत्याने येत आहे. हे दैवी कण मोरपंखी, पिवळा, चंदेरी, लाल, निळा इत्यादी विविध रंगांचे असतात. या अनुभूतीमुळे ‘ज्याप्रमाणे वाईट शक्ती ज्या वेगाने त्रास देतात, त्याच वेगाने भगवंत दैवी कणांचा वर्षाव करून आमचे रक्षण करतो’, याची तीव्रतेने जाणीव होऊन माझ्याकडून कृतज्ञता व्यक्त झाली.’

-होमिओपॅथी वैद्या (सुश्री (कु.)) आरती तिवारी, सनातन आश्रम, रामनाथी, गोवा. (१२. ०१. २०२०)