ऊस देयकातून शेती पंपाची वीजदेयके वसूल करा ! – रामराजे नाईक-निंबाळकर, सभापती, विधानपरिषद

फलटण, २२ डिसेंबर (वार्ता.) – तालुक्यातील शेतकर्‍यांची शेती पंपाची वीजदेयके त्यांची पूर्वसंमती घेऊन संबंधित साखर कारखान्याच्या माध्यमातून ऊस देयकातून वसूल करावीत; मात्र कोणत्याही परिस्थितीत शेती पंपाचा वीजपुरवठा खंडित करू नये, असे निर्देश विधानपरिषदेचे सभापती श्रीमंत रामराजे नाईक-निंबाळकर यांनी दिले. येथील पंचायत समितीच्या सभागृहात आयोजित बैठकीत ते बोलत होते. या वेळी लोकप्रतिनिधी, महावितरणचे अधिकारी आणि शेतकरी उपस्थित होते.

रामराजे नाईक-निंबाळकर म्हणाले, ‘‘तालुक्यातील वीजपंपाची जोडणी तोडण्याचे काम मोठ्या प्रमाणात चालू आहे. विद्युत् जनित्राचाच वीजपुरवठा खंडित केल्यामुळे नियमित वीजदेयके भरणार्‍यांवर अन्याय होत आहे. त्यांच्या पिकांची मोठ्या प्रमाणात हानी होत आहे. शेतकर्‍यांनी वीजदेयकांविषयी संबंधित साखर कारखान्यांना संमतीपत्र भरून देणे आवश्यक आहे.