ह.भ.प. प्रज्ञाताई रामदासी यांचा ‘कीर्तनभीष्म कृतार्थता’ पुरस्काराने गौरव !

गोंदी येथे मराठवाडा नारदीय कीर्तन महोत्सवाचे आयोजन

बीड, २० डिसेंबर (वार्ता.) – श्रीक्षेत्र गोंदी येथे चालू असलेल्या श्री दत्तजयंती महोत्सवाच्या वेळी मराठवाडा नारदीय कीर्तन महोत्सवाचे आयोजन करण्यात आले होते. या प्रसंगी बीड येथील प्रख्यात राष्ट्रीय कीर्तनकार वैकुंठवासी ह.भ.प. भरतबुवा रामदासी यांच्या सहधर्मचारिणी ह.भ.प. प्रज्ञाताई भरतबुवा रामदासी यांना वैकुंठवासी कीर्तनभीष्म ह.भ.प. अच्युत गणेश मुळे (गोंदिकर) यांच्या स्मृतीप्रित्यर्थ यावर्षी ‘कीर्तनभीष्म कृतार्थता’ सन्मानाने गौरवण्यात आले.

गोंदी येथील श्रीगुरुदत्तधाम येथे दत्तजयंतीच्या निमित्ताने प्रतिवर्षी मराठवाडा नारदीय कीर्तन महोत्सवाचे आयोजन करण्यात येते. वैकुंठवासी कीर्तनभीष्म ह.भ.प. अच्युत गणेश मुळे (गोंदीकर) यांच्या स्मृतीप्रित्यर्थ हा महोत्सव घेण्यात येतो. ते सातारा जिल्ह्यातील औंध येथील श्रीमंत बाळासाहेब पंत प्रतिनिधी यांचे प्रशिष्य आणि प्रख्यात कीर्तनकार म्हणून ओळखले जात होते. त्यांनी स्वातंत्र्यपूर्व काळात राष्ट्रीय कीर्तनाच्या माध्यमातून समाज प्रबोधन करून देशसेवा केली.

या वेळी रामानंद स्वामी संस्थान श्रीक्षेत्र गोंदीचे श्री. नारायण महाराज मठपती आणि स्वानंदसुखनिवासी जोग महाराज मंदिर अंकुशनगर येथील डॉ. अर्जुन महाराज जाधव, तसेच श्रीगुरुदत्तधाम श्रीक्षेत्र गोंदीचे ह.भ.प. प्रकाश महाराज मुळे (गोंदीकर) यांची वंदनीय उपस्थिती होती. या वेळी ह.भ.प. प्रदीप महाराज मुळे यांनी प्रास्ताविक केले, तर श्री. श्रीपाद मुळे यांनी सूत्रसंचालन केले. श्री. योगीराज मुळे यांनी आभार मानले.